Հայաստանի Կառավարությունը 180 հազար դոլար կհատկացնի Երեւանի քաղաքային լուսավորության հարցով խորհրդատու ընկերությանը: Համապատասխան որոշումն ընդունվել է գործադիրի հոկտեմբերի 27-ի նիստում:
Այդ միջոցները կստանա «P&C» ընկերությունը՝ Երեւանի քաղաքային լուսավորության վարկային ծրագրի դրամաշնորհային բաղադրիչի տեսքով, որը Կառավարությունը 2015 թվականի մայիսին ստորագրել է Վերակառուցման եւ զարգացման եվրոպական բանկի (EBRD) հետ: Խորհրդատու ընկերությունը կօգնի ժամանակակից տեխնոլոգիաների եւ ծառայությունների գնման ծրագիր կազմել:
Հիշեցնենք, որ ծրագրով նախատեսվում է 3.7 մլն եվրոյի չափով վարկ EBRD-ից, որին կավելանա Էներգետիկ արդյունավետության եւ էկոլոգիական գործընկերության արեւելաեվրոպական հիմնադրամից (E5P) ստացված 1.9 մլն դոլարի չափով դրամաշնորհը: Նախագծի նպատակը Երեւանի Կենտրոն եւ Արաբկիր վարչական շրջանների 28 փողոցների սովորական լուսարձակները LED լամպերով փոխարինելն է:
