Երեւանում, այսօր` ապրիլի 27-ին, ԵԱՀԿ երեւանյան գրասենյակի նախաձեռնությամբ տեղի է ունեցել աշխատաժողով` միջազգային եւ ազգային օրենսդրությամբ ամրագրված փոքրամասնությունների իրավունքներին ու քաղաքական գործիչների, լրատվամիջոցների եւ հասարակական լայն շերտերի շրջանում դրանց վերաբերյալ իրազեկության բարձրացման մեխանիզմներին նվիրված:
«Օրենսդրական դրույթների եւ միջազգային չափորոշիչների իմացությունը կարեւոր է ազգային փոքրամասնությունների իրավունքների պաշտպանությունը ապահովելու համար: Հուսով եմ, որ այսօրվա քննարկումը մեզ կօգնի լինել ավելի լավ տեղեկացված այս ուղղությամբ թե’ պետական եւ թե’ քաղաքացիական հասարակության տարբեր դերակատարների ձեռնարկած բոլոր գործողությունների եւ միջոցառումների մասին», - ասել է ԵԱՀԿ երեւանյան գրասենյակի Մարդու իրավունքների հարցերով պատասխանատու Վլադիմիր Չունտուլովը:
Մասնակիցներին ներկայացվել է նաեւ ազգային փոքրամասնությունների իրավունքներին վերաբերող փաստաթղթերի ընտրանին, որը պատրաստվել է ԵԱՀԿ երեւանյան գրասենյակի կողմից` Հայաստանի Հանրապետության արտաքին գործերի նախարարության եւ ՀՀ կառավարության ազգային փոքրամասնությունների եւ կրոնի հարցերի վարչության հետ սերտ համագործակցությամբ: Ձեռնարկը ներկայացնում է ՀՀ վավերացրած միջազգային պայմանագրերի` ազգային փոքրամասնությունների իրավունքների վերաբերյալ դրույթների ակնարկ, ինրպես նաեւ խորհրդատվական բնույթի փաստաթղթեր եւ քաղվածքներ ՀՀ օրենսդրությունից:
Մասնակիցները քննարկել են նաեւ փոքրամասնությունների լեզուների գործածումը վարչական իշխանությունների հետ հաղորդակցվելիս, փոքրամասնությունների իրավունքների մասին իրազեկության եւ բարելավված օրենսդրության եւ պրակտիկայի հարաբերակցությունը, ինչպես նաեւ Մարդու իրավունքների պաշտպանի գրասենյակի դերը` որպես փոքրամասնությունների իրավունքների պաշտպանության կարեւոր մեխանիզմ:
Ձեռնարկի էլեկտրոնային տարբերակը` մատչելի միայն հայերենով, տեղադրված է ԵԱՀԿ կայքէջում:
