Թբիլիսիի պոլիկլինիկաների բժիշկները, որոնք չեն ցանկացել հայտնել իրենց անունը, տեղեկացրել են, թե, ըստ առողջապահության նախարարության, երկրում «խոզի գրիպի» համաճարակ է սկսվել: Չնայած դրան, նախարարությունում հայտնում են, որ երկիրը գտնվում է համաճարակի նախաշեմին, բայց խուճապի մատնվելու հիմքեր չկան:
Թերթերի տեղեկություններով, մանկական հիվանդանոցները լեփ-լեցուն են հիվանդներով: Չնայած, որ պաշտոնապես կարանտին հայտարարվել է միայն Իաշվիլիի անվան մանկական հիվանդանոցում, ոչ պաշտոնապես կարանտին է գործում նաեւ մյուս մանկական կլինիկաներում: Բժիշկների մի մասը հաստատում, մյուսը հերքում է այդ փաստը:
Ինչպես արդեն հայտնել է NEWS.am-ը, պաշտոնական տվյալներով, Վրաստանում կա 422 վարակման դեպք: Միայն վերջին մեկ օրվա ընթացքում հաստատվել է 50 նոր դեպք: Վարակվածների հիմնական մասը 5-ից 14 տարեկան երեխաներ են: Որոշ վրացի համաճարակաբաններ պնդում են, որ վարակվածների իրական թիվը 5-6 անգամ գերազանցում է պաշտոնական տվյալները:
