NEWS.am-ի ունեցած հավաստի տեղեկությունների համաձայն՝ Գյումրիում տեղակայված Ռուսաստանի Դաշնության 102-րդ ռազմաբազայի թիվ 19 միջն. դպրոցում, հակառակ A/H1N1 գրիպի կանխարգելման նպատակով դասերը դադարեցնելու ՀՀ Կրթության եւ գիտության նախարարության՝ օրեր առաջ ընդունած որոշման, դասերը շարունակվում են։
Պարզաբանումներ ստանալու համար NEWS.am-ի թղթակիցը կապ հաստատեց ՀՀ Կրթության եւ գիտության նախարարության հանրակրթության վարչության պետի տեղակալ Արտակ Պողոսյանի հետ։ Պարզվեց, որ նախարարաթյունում տեղյակ չէին, որ վերոնշյալ հանրակրթական դպրոցում դասերը չեն դադարեցվել։ Հարցին, թե սա կարո՞ղ է դիտվել որպես ռուսական իշխանությունների ենթակայության տակ գտնվող դպրոցների՝ ՀՀ Կրթության եւ գիտության նախարարության որոշմանը չենթարկվելու փորձ, ոլորտի ներկայացուցիչը նշեց, որ իրենք պատրաստվում են «նախարարի մակարդակով դիմել Հայաստանում ՌԴ դեսպանատուն, տեղեկացնել խնդրի մասին, եւ ամեն ինչ անելու են, որպեսզի արդեն երկուշաբթի դասերն այդ դպրոցում դադարեցվեն»։
Հարցին, թե ի՞նչ դիրքորոշում կցուցաբերի նախարարությունը, եթե, այնուամենայնիվ, ռուսական դեսպանատունը մերժի դասերը կասեցնելու առաջարկը, Ա. Պողոսյանը պատասխանեց, որ այդ դեպքում իրենք ոչ մի իրավունք չեն կարող բանեցնել «Ռուսաստանի Կրթության եւ գիտության նախարարության ենթակայության տակ գտնվող այդ դպրոցի վրա»։