Միջազգային հանրությունն ի վիճակի չէ լուծել որեւէ խնդիր, այդ թվում` իրանականը: Այդ մասին IzRus կայքի հետ հարցազրույցում հայտնել է Իսրայելի արտգործնախարար Ավիգդոր Լիբերմանը` խոսելով Իրանի հետ նրա միջուկային ծրագրի վերաբերյալ «Վեցյակի» բանակցությունների մասին:
«Մենք կողքից տեսնում ենք, որ միջազգային հանրությունն ի վիճակի չէ լուծել որեւէ խնդիր, այդ թվում` իրանականը: Իրանը դա հասկանում է: Այդ պատճառով էլ իրեն այդքան հանդուգն է պահում, ձգձգում է բանակցային գործընթացը:
Այսօր իրադրությունը հետեւյալն է` երկու այլընտրանքներից ` ռումբ կամ ռմբակոծել, համաշխարհային հանրությունը նախապատվությունը տալիս է ռումբին: Իսկ Իրանի զինանոցում միջուկային ռումբն անմիջական սպառնալիք է տարածաշրջանի երկրներին:
Այն այաթոլլահներին հնարավորություն կտա էլ ավելի անպատկառ արտաքին քաղաքականություն վարել: Դա նշանակում է Մերձավոր Արեւելքի եւ Հյուսիսային Աֆրիկայի վարչակարգերի քայքայում, աճող ներթափանցում Հարավային Ամերիկա եւ Հարավ-Արեւելյան Ասիա»,- նշել է Լիբերմանը:
Բացի դրանից, նա նշել է, որ կմեծանա միջուկային տեխնոլոգիաների արտահոսքը եւ «կեղտոտ» միջուկային ռումբերի ստեղծումը: Այդ պատճառով էլ միջազգային հանրության բռնած դիրքորոշումը չեզոք է, որի համար պատասխանը կտրվի ապագայում:
