Ամերիկյան Ռոդ Այլենդ նահանգի Ուորուիք քաղաքն ամեն տարի մայիսի 20-ին կնշի Շուշիի ազատագրման օրը: Այդ մասին հայտնում է «Asbarez»-ը` վկայակոչելով ԱՄՆ-ում Լեռնային Ղարաբաղի գրասենյակին:
«Շուշին ազատագրվել է շնորհիվ հայ զինվորների քաջության, հրաշալի ռազմավարության եւ կազմակերպվածության», – ասվում է Ուորուիքի քաղաքապետ Սքոթ Ավետիսյանի հռչակագրում:
«Արցախի եւ Հայաստանի միավորման փորձերը բախվել են Ադրբեջանի դիմակայությանը», – նշվում է հռչակագրում եւ ընդգծվում, որ «Շուշիի ազատագրումը դարձել էր կյանքի եւ մահվան հարց»: Հռչակագրում Շուշիի ազատագրումը բնորոշվում է որպես «անցումային պահ ԼՂՀ-ի եւ Ադրբեջանի միջեւ պատերազմում:
Շուշիի քաղաքապետ Կարեն Ավակիմյանը շնորհակալություն է հայտնել Ավետիսյանին հռչակագրի ընդունման համար: Ավակիմյանի նամակում ասվում է. «20 տարի առաջ Շուշի քաղաքը վերադարձվեց հայ ժողովրդին, որպեսզի դառնա քաջության եւ դիմացկունության, անձնվեր պայքարի եւ արդարության խորհրդանիշ»:
