Ռուսաստանյան ընդդիմությունը որոշել է իր ավանդը ներդնել «Մագնիտսկու ցուցակն» ընդլայնելու գործում: Նրանք առաջարկել են ցուցակում ընդգրկել մայիսի 6-ին Բոլոտնայա հրապարակում անկարգությունների գործը քննող իրավապահների եւ այլոց:
Նախօրեին Բորիս Նեմցովն ու Գարրի Կասպարովը ամերիկացի կոնգրեսական Քեւին ՄքՔարթնիին են հանձնել հանրահավաքի տեսագրությունը, որտեղ երեւում են ոստիկանների անհամարժեք գործողությունները: Նրանք նաեւ առաջարկել են ցուցակում ընդգրկել ՌԴ Քննչական կոմիտեի Ալեքսանդր Բաստրիկինին, Pussy Riot-ի գործով քննիչների, դատավորների:
Մի շարք իրավապաշտպաններ եւս մտադիր են դիմել` ցանկն ընդլայնելու խնդրանքով:
«Մագնիտսկու ցանկը» ենթադրում է վիզային պատժամիջոցներ եւ բանկային հաշիվների սառեցում ռուսաստանցի 60 պաշտոնյաների նկատմամբ, որոնք ենթադրաբար մեղսակից են Մոսկվայի մեկուսարանում 2009թ. իրավաբան Սերգեյ Մագնիտսկուն կտտանքների ենթարկելու եւ սպանելու գործին: