Վիճակագրությունը վկայում է, որ ամերիկացիների մեծ մասն իր կյանքի ընթացքում աշխատանքը փոխում է միջինը 13 անգամ: Մանեքենուհի Մարինա Փոսման առայժմ 13 կարիերա չի արել, սակայն մոտ է դրան` իրեն դրսեւորելով որպես բազմաշնորհ հայ կին, գրում «The Armenian Weekly»-ին:
Նա ծնվել է Հունգարիայում` հայ եւ ռուս ծնողներից: Սակայն Հունգարիայում երկար չի ապրել. «Ես երբ փոքր էի, տարբեր վայրերում եմ բնակվել. Բաքվում, Ղազախստանում, Կիեւում, Մոսկվայում, Սանկտ Պետերբուրգում եւ Սամարայում»,-բացատրում է նա: Փոստման սկզբում ուսանել է Մոսկվայի միջազգային համալսարանում ` բիզնեսի կառավարման գծով: Ռուսաստանում ազգային զբոսաշրջային ծրագրի վրա աշխատելիս ընդունվել է նաեւ ոճաբանական դպրոց:
Մանեքենուհու աշխատանքի նկատմամբ հետաքրքրությունը նրա մոտ առաջացել է մոր ազդեցությամբ, ով աշխատել է որպես մենեջեր այնպիսի խանութներում, ինչպիսիք են «Sears»-ը եւ «Macys»-ը: «Ես մտածում էի մանեքենուհի աշխատելու մասին, երբ 17 տարեկան էի: Այդ պահից ի վեր դա այն է, ինչի մասին երազել եմ»,-ասում է նա:
Նա իրեն անգամ փորձել է դերասանական աշխատանքում` դեռ Ռուսաստանում: Սակայն նրա մոդելային կարիերայի սկիզբը դրվել է 2006 թ-ին` Նյու Յորք տեղափոխվելուց հետո:
«Գեղեցկության եւ նորաձեւության նկատմամբ իմ սերը հանգեցրեց նրան, որ ես մոդելային գործը մշտական աշխատանք դարձնեմ»,-ասում է Փոստման: Իր կարիերայի ընթացքում նա հնարավորություն է ունեցել աշխատել այնպիսի հայտնի բրենդների հետ, ինչպիսիք են «Lancôme»-ը, «LOreal»-ը եւ «Redken»-ը:
Նա լրջորեն է վերաբերվում իր մասնագիտությանը եւ հաճույքով բացատրում, որ իր ժառանգությունը հաջողության է հանգեցրել. «Հայ ժողովրդի դժվարությունները եւ ահավոր կորուստները ինձ ավելի վճռական են դարձրել: Ես ոգեշնչվել եմ հայ ժողովրդով, նրա օրինակը ինձ հաջողության հասնելու համար համառություն է տվել` հասարակության մեջ ներդրում ունենալու համար: Ցանկանում եմ, որպեսզի հայ ժողովուը հպարտանա ինձնով»:
Փոստման նաեւ խոստովանում է, որ իր ժառանգությունը իրեն նաեւ օգտակար նվեր է տվել` մոդելային գործի տեսանկյունից: «Իմ թուխ մաշկը իմ առավելություններից մեկն էր բազմամշակութային Նյու Յորքում»,- բացատրում է նա: