Իրանի նախագահի պաշտոնում Մահմուդ Ահմադինեջադի վերընտրման դեմ նախորդ տարի կայացած ցույցերի առնվազն երեք մասնակիցների մահվան համար պատասխանատվություն է կրում Թեհրանի նախկին դատախազ Սայիդ Մորթազավին: Այդ մասին ասված է խորհրդարանական հանձնաժողովի զեկույցում, որ հրապարակվել է կիրակի՝ հունվարի 10-ին:
Հանձնաժողովի ներկայացուցիչների տվյալներով, հենց Սայիդ Մորթազավին է պնդել, որ ձերբակալված ցուցարարներին տեղափոխեն Կահրիզակ ճամբար, որտեղ նրանց ծեծելով սպանել են, հաղորդում է «Ազատություն» ռադիոկայանը:
Սպանության մեջ մեղադրվում էին բանտի 12 աշխատակիցներ:
Երկրի իշխանություները վերջապես ստիպված են եղել փակել Կահրիզակ ճամբարը, պաշտոնանկ անել Մորթազավիին եւ հանձնաժողով ստեղծել:
Ձերբակալված ցուցարարները, ինչպես ասվում է զեկույցում, չորս օրվա ընթացքում պահվել են ծանր պայմաններում՝ 30 վտանգավոր հանցագործների հետ միասին. «Ձերբակալվածները ծեծի են ենթարկվել բանտապանների կողմից»:
Զեկույցի հեղինակները նշում են, որ «տեղի ունեցածը վարկաբեկում է իսլամական համակարգը», եւ պահանջում են պատժել մեղավորներին՝ «անկախ նրանց զբաղեցրած պաշտոնից», հաղորդում է AFP-ն: