Ղարաբաղյան հակամարտությունն ու հայ-թուրքական հարաբերությունները տարածաշրջանում իրավիճակի հիմնարար գործոններից են: Այդ մասին մարտի 11-ին հայտարարել է Հայաստանի պաշտպանության նախարար Սեյրան Օհանյանը՝ հանդես գալով Երեւանում ՆԱՏՕ-ի խորհրդարանական վեհաժողովի կազմակերպած «Ռոուզ ռոթ» սեմինարին:

Ինչպես նշել է Օհանյանը, Հայաստանը ձգտում է տարածաշրջանում խաղաղություն եւ կայունություն հաստատել, լավ հարաբերություններ ունենալ հարեւանների հետ, խաղաղ ճանապարհով կարգավորել հակամարտությունները, երկիրը որդեգրել է անվտանգության բազմաշերտ համակարգ:

«Եվրոպական ինտեգրման քաղաքականությունը առանցքային նշանակություն ունի Հայաստանի համար: Եվրոպան կարող է մեծ դեր խաղալ անվտանգության հարցերում՝ հաշվի առնելով, որ ղարաբաղյան հակամարտությունը կարգավորվում է ԵԱՀԿ Մինսկի խմբի միջոցով»,- ասել է Օհանյանը:

Եվրոպան, ըստ Օհանյանի, կարեւոր դեր է խաղում Թուրքիայի հետ հարաբերությունների կարգավորման գործընթացում եւ Հայոց ցեղասպանության միջազգային ճանաչման գործում:

«Հայաստանը ողջունում է եվրոպական ազդեցության մեծացման հնարավորությունը տարածաշարջանում եւ Եվրամիության հետ ռազմական արդյունաբերողների միջոցով հնարավոր համագործակցությունը: Հայաստանը շահագրգռված է ՆԱՏՕ-ի եւ ԵՄ-ի հետ համագործակցության հարցում եւ այն արդյունավետ է գնահատում»,- ասել է Հայաստանի պաշտպանության նախարարը:

Նախարարը նշել է, որ ՆԱՏՕ-ի շրջանակներում Հայաստանն արդյունավետ համագործակցում է Հունաստանի, Ռումինիայի, Ֆրանսիայի, Մեծ Բրիտանիայի հետ։ «Անվտանգության ոլորտում այդ երկրների զուգահեռ համագործակցությունն Ադրբեջանի հետ կբարձրացնի տարածաշրջանային անվտանգությունը, եւ ես Ֆրանսիայում բարձրացրել եմ այդ հարցը»:

Նախարարը նշել է նաեւ, որ հայ խաղաղարարներն այսօր ավելի շատ ցանկանում են Աֆղանստան գնալ, քան Կոսովո կամ Իրաք:

Օհանյանը հավելել է, որ այս տարվա սեպտեմբերին ՆԱՏՕ-ի գործողությունների ծրագրի շրջանակներում Երեւանում երկրաշարժերին արձագանքման զորավարժություններ կանցկացվեն։