Հայոց ցեղասպանության 95-րդ տարելիցի կապակցությամբ լիբանանահայ համայնքը քայլերթ է կազմակերպել, որը մեկնարկել է Անթիլիասի մայրավանքից եւ ավարտվել ընդամենը ժամ-ժամուկես առաջ։ NEWS.am-ի թղթակցի հետ զրույցում այս մասին հայտնեց «Ազդակ» թերթի խմբագրապետ Շահան Քանդահարյանը։
Նշելով, որ Անթիլիասի կաթողիկոսարանից մեկնարկած քայլարշավին մասնակցել է ավելի քան 60 հազար մարդ, նա նկատեց, որ դա «բավական զանգվածային մասնակցություն էր»:
«Նախքան քայլարշավը՝ Ցեղասպանության անմեղ նահատակների հիշատակի համար պատարագ մատուցվեց, որի ժամանակ Արամ Ա կաթողիկոսը խոսք վերցրեց եւ աղոթեց 1.5 միլիոն անմեղ զոհերի հոգիների հանգստության համար»,- տեղեկացրեց «Ազդակ»-ի խմբագրապետը՝ ավելացնելով, որ քայլարշավին հաջորդած հանրահավաքում բազմաթիվ ելույթներ են հնչել։ «Քայլարշավին հաջորդեց հանրահավաքը, որին բացի հայերից, մասնակցում էին նաեւ խորհրդարանի պատգամավորներ, լիբանանյան քաղաքական ուժերի ներկայացուցիչներ»,- նշեց նա։
Շ. Քանդահարյանի խոսքով, Ցեղասպանության զոհերի ոգեկոչման միջոցառումների շրջանակներում երեկ երեկոյան Անթիլիասի մայրավանքի Նահատակաց մատուռի առջեւ տեղի է ունեցել նաեւ հսկումի երեկո, որին մասնակցել են հայ քաղաքական կուսակցությունների ուսանողական եւ երիտասարդական միավորումներ. «Այնտեղ եւս երիտասարդները հանդես են եկել Ցեղասպանության միջազգային ճանաչման պահանջով»,- տեղեկացրեց Քանդահարյանը։
Ամփոփելով՝ «Ազդակ»-ի խմբագրապետը տեղեկացրեց, որ ոգեկոչման միջոցառումների շարքն այսքանով չի ավարտվում, եւ որ նախատեսվում են ֆիլմերի եւ գեղանկարների ցուցադրություններ. «Վաղը նախատեսված է Ցեղասպանության մասին պատմող վավերագրական ֆիլմերի եւ տեսահոլովակների, ինչպես նաեւ գեղանկարների ցուցադրություն»: