Գյումրիի «Մոր  ու մանկան Ավստրիական կենտրոնում» հուլիսի 20-ի առավոտյան նշիկների վիրահատությունից 5 օր անց մահացած 4-ամյա Սուրեն Պողիկյանի մահվան պատճառը նախնական տվյալներով արնահոսությունն է եղել։ Այս մասին NEWS.am-ին ասաց Շիրակի մարզպետարանի առողջապահության վարչության պետ Հովհաննես Հովհաննիսյանը:

«Վիրահատության ժամանակ երեխայի մոտ արնահոսություն է առաջացել, ինչը  կանխվել է, բնականաբար, սակայն 5 օր անց երեխայի մոտ վիրահատական վերքերը դեռ վերջնական չբուժված, երբ հազացել է, այդ արյունը մեխանիկորեն լցվել է շնչափողն ու խեղդվել է»,- ասաց Հովհաննես Հովհաննիսյանը։

4-ամյա Սուրեն Պողիկյանը Շիրակի մարզի Արեւիկ համայնքից է, տան կրտսեր զավակը, ավագ եղբայրը՝ Խորենը, 6 տարեկան է: Արեւիկի համայնքապետ Գարեգին Ստեփանյանը NEWS.am-ի հետ զրույցում ասաց, որ երեխայի հայրը ՝ Գուրգեն Պողիկյանը, արտագնա աշխատանքի է մեկնել Ռուսաստանի Դաշնություն: Գյուղապետի խոսքով՝ նա արդեն վերադարձի ճանապարհին է, երեկոյան  տանը կլինի:

«Հիմա ամբողջ գյուղն այդ երեխայի տանն է, մենք բոլորս զարմացած ենք կատարվածից, ծնողներն այնքան ուշադիր էին իրենց երեխաների նկատմամբ, հատկապես այս փոքրիկի վրա  շատ էին դողում, որ հանկարծ չհիվանդանա, բայց տեսեք՝ ինչ եղավ»-ասաց համայնքապետ Գարեգին Ստեփանյանը:

Նշենք, որ կատարվածի առնչությամբ հարուցվել է քրեական գործ, նշանակվել է դատաբժշկական փորձաքննություն։