Առնվազն զարմանալի է, որ Ղարաբաղի հետ կապված խնդիրների կամ Հայաստանում «բոցը» մարելու մասին հայտարարում է Լեւոն Տեր-Պետրոսյանը, ում գաղափարները ղարաբաղյան հիմնախնդրի կարգավորման շուրջ բոլորին են հայտնի: Այս մասին NEWS.am-ի թղթակցի հետ զրույցում հայտարարեց ՀՀ Ազգային ժողովի փոխխոսնակ, իշխող Հանրապետական կուսակցության մամուլի խոսնակ Էդուարդ Շարմազանովը՝ մեկնաբանելով այաստանի առաջին նախագահ Լեւոն Տեր-Պետրոսյանի հարցազրույցը:
Վերջինը հարցազրույցում նշել էր Եվրասիական տնտեսական միությանը Հայաստանի անդամակցության գործընթացի ձգձգման պատճառը, անդրադարձել Ադրբեջանի կողմից սահմանային խախտումների, ինչպես նաեւ ներքաղաքական թեմաներին:
«Այս դեպքում հարկ է հիշել հայտնի ասացվածքը. գողն առաջինն է գոչում՝ բռնեք գողին: Եվ քաղաքական գործիչը, ով հասարակությունում հայտնի է որպես Ղարաբաղը վաճառելու քաղաքականության առաջնորդ, այսօր փորձում է մեզանից պաշտպանել ԼՂՀ-ն: Այդ նվազագույնն անբարոյականություն է, երբ քաղաքական գործիչը, հանուն իր կամ ուրիշի ներկուսակցական ճղճիմ շահերի, սկսում է խոսել Ղարաբաղի մասին: Հարցազրույցում հստակ երեւում է, որ նրա նպատակը ո՛չ Եվրասիական միությունը, ո՛չ էլ սահմանային միջադեպերն են, այլ անձնական ճղճիմ շահերը»,- ասաց Շարմազանովը:
