Թբիլիսի հայկական եկեղեցու վրա հուլիսի 19-ի հարձակումը եղել է կենցաղային հողի վրա, չարժե ակտիվ քաղաքականացնել: Այս մասին NEWS.am-ին ասաց քաղաքագետ Երվանդ Բոզոյանը:
«Չարժե ակտիվ քաղաքականացնել, եղել է կենցաղային վեճ, պետք չէ դրա համար փչացնել հայ-վրացական հարաբերությունները: Պետք է հենց կենցաղային մակարդակի էլ թողնել այդ վեճը: Իհարկե, Վրաստանում կան հակահայկական տրամադրություններ, Հայաստանում կան հակավրացական տրամադրություններ: Մեզ ձեռնտու չէ փչացնել հայ-վրացական հարաբերություններ: Ցանկացած մեկնաբանություն կարող է բռնկել իրավիճակը: Այս ծանր պայմաններում մեզ հաստատ ձեռնտու չէ այս ամենը»,- ասաց քաղաքագետը:
Նշենք, որ Վրաստանում Հայաստանի դեսպան Յուրի Վարդանյանը NEWS.am-ի հետ զրույցում նույնպես ձեռնպահ էր մնացել որեւէ հայտարարությունից:
Ավելի վաղ NEWS.am-ը հայտնել էր, որ հուլիսի 19-ին, երեկոյան ժամը 17:00-ի սահմաններում, Թբիլիսիի Սուրբ Էջմիածին եկեղեցու բակում, ազգային եւ կրոնական ատելությամբ դրդված, իրականացվել է ծրագրված հարձակում Թբիլիսիի Սուրբ Էջմիածին եկեղեցու հոգեւոր դասի, թեմի պաշտոնեության եւ հավատացյալների վրա: Խումբը, հավաքագրելով մոտ 50 հոգի, հարձակվել է եկեղեցու առջեւ կանգնած Տեր Մանուկ քահանա Զեյնալյանի, թեմի Իրավական հարցերով եւ համագործակցության բաժնի տնօրեն Լեւոն Իսախանյանի եւ տնտեսվար Ռոբերտ Իսախանյանի վրա եւ դաժանորեն ծեծել նրանց՝ մարմնական վնասվածքներ հասցնելով հոգեւորականներին եւ Առաջնորդարանի աշխատակիցներին: