Հուլիս 15-ին Երեւանի Նոր-Նորք թաղամասում հարեւանների կողմից դաժան ծեծի ենթարկվելուց հետո մահացած, արցախյան ազատամարտի մասնակից, 52-ամյա Վարդան Թումանյանի կնոջը՝ Տանյա Մելքումյանին ոստիկանությունում առերեսման ժամանակ սպառնացել է գործով կալանավորված Գեւորգ Սարգսյանը: Այս մասին NEWS.am-ի հետ զրույցում ասաց Տանյա Մելքումյանը:
«Քննիչի մոտ նայում ա աչքերիս ու ասում՝ թաղեմ երեխեքիս, թե ես խփել եմ, այդպես ստում ա: Հետո էլ ինձ ա նայում ու ասում՝ մարդ կա վերեւում, քեզ նայում ա, քթերիցդ կբերի, հիշի, որ դու աղջիկ ունես»,- պատմեց տիկին Տանյան:
Տանյա Մելքումյանի կարծիքով, «վերեւում մարդ կա» ասելով, նա ցանկացել է հիշեցնել, որ իր մայրը գուշակ է, եւ որ իրենք մեծ հնարավորություններ ունեն:
«Ես իրեն ասացի, որ ես քո էդ մարդուց չեմ վախենում: Ես իրեն ասում եմ՝ դու հաստլիկ ես, բայց շատ թափանցիկ ես, ես հասկանում եմ՝ ինչ ես ուզում ասել ենթատեքստով: Քննիչին ասում եմ՝ արձանագրեք, որ սպառնում է, Գեւորգն ասաց՝ ես Աստծուն նկատի ունեմ»,- ասաց տիկին Տանյան:
Սպանված ազատամարտիկի կնոջ խոսքով՝ առերեսման ժամանակ «լպիրշ» պահվածք է դրսեւորել նաեւ Գեւորգ Սարգսյանի փաստաբանը. «Այդպիսի փաստաբան չի լինում, թող պաշտպանի Գեւորգին, բայց ոչ թե ձեռ առնի ինձ ու աղջկաս»:
Տանյա Մելքումյանը պատմեց, որ Գեւորգ Սարգսյանի մայրըը՝ Անահիտը, գուշակ է, նրանք զբղավում են «խարդախ բիզնեսով». «Անահիտը, ենթադրենք, գուշակել ա, որ դու գումարի կորուստ ունես, ասում ա ՝ եթե պետք ա, ես տղաներ ունեմ, որոնք կարող են այդ գումարները վերադարձնել: Նրանք խարդախ բիզնես են անում, մարդկային հոգու բիզնես, մարդկային ծեծի բիզնես»:
Ինչպես ավելի վաղ հաղորդել էր NEWS.am-ը, հուլիսի 13-ին մարմնական վնասվածքներով հիվանդանոց տեղափոխված եւ հուլիսի 15-ին մահացած ազատամարտիկ Վարդան Թումանյանի մահվան առնչությամբ հարուցվել է քրեական գործ Քրեական օրենսգրքի 112-րդ հոդվածի 2-րդ մասի 6-րդ, 14-րդ կետերով, այն է՝ դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից, եւ անզգուշությամբ առաջացրել տուժողի մահ: Գեւորգ Սարգսյանն ու Գագիկ Ղուկասյանը կալանավորվել են։ Նախաքննությունը շարունակվում է: