Մոսկվա է ուղարկվել հայ գործարար եւ մեկենաս Լեւոն Հայրապետյանի հիվանդության պատմությունը, եւ հույս ունենք, որ այդ հանգամանքը հաշվի կառնվի: Այս մասին հուլիսի 22-ին կայացած մամուլի ասուլիսում հայտարարեց Լեւոն Հայրապետյանի բժիշկ Հենրիխ Բակունցը՝ նշելով, որ չնայած բժշկական գաղտնիությանը՝ որոշ մանրամասներ կներկայացնի Հայրապետյանի առողջական վիճակի մասին:
Բժշկի խոսքով, Հայրապետյանն անոթների հիվանդություն ունի, սրտի եւ ուղեղի կաթված է տարել, շաքարախտ ունի, սրտի ստենտավորում է կատարվել. «Շատ դժվար է նրան համոզել զբաղվել իր առողջությամբ, նման հիվանդները պետք է տարեկան երկու անգամ լուրջ բուժում անցնեն: Սակայն Հայրապետյանը բուժման կողմնակից չէ, նրան ավելի շատ գործերն են մտահոգում: Նա կարող է ընդհատել բուժումը եւ գործերով գնալ Ղարաբաղ»:
Բակունցը նաեւ ընդգծեց, որ Լեւոն Հայրապետյանին հակացուցված են բանտային պայմանները. «Նման հիվանդները չպետք է կալանքի տակ լինեն: Նա ամեն ժամ դեղ է ընդունում, եւ եթե ռեժիմը խախտի, այդ շատ վատ կանդրադառնա նրա առողջության վրա»:
Նշենք, որ գործարար Լեւոն Հայրապետյանի կալանքը լիազորել է Մոսկվայի Բասմաննի դատարանը: Նրան մեղադրանք է առաջադրվել ՌԴ Քրեական օրենսգրքի 160 եւ 174 հոդվածներով: Հայրապետյանը կալանավորվել է 2 ամիս ժամկետով:
Հավելենք, որ Լեւոն Հայրապետյանը աշխարհում հայկական սփյուռքի ամենահարուստ ներկայացուցիչների տասնյակում է (զբաղեցնում է 10-րդ տեղը):
