Հայաստանում թուրքական պաղպաղակ չի վաճառվում: Այդ մասին այսօր՝ հւլիսի 23-ին, լրագրողներին հայտարարեց «Իրազեկ եւ պաշտպանված սպառող» հասարակական կազմակերպության նախագահ Բաբկեն Պիպոյանը:
Նրա խոսքով՝ վերջին ժամանակներս այդ մասին տարածված բամբասանքները իրականությանը չեն համապատասխանում: «Ներմուծվող պաղպաղակ ունենք, սակայն հիմնականում Ֆրանսիայից: Սակայն դրանց վրա նույնիսկ անհրաժեշտ պիտակավորում չկա», - ասել է Պիպոյանը: Մասնավորապես, ինչպես տեղական, այնպես էլ արտասահմանյան պաղպաղակում չի նշվում բուսական ճարպերի առկայության մասին: «Եթե խոսենք թուրքական ապրանքների մասին, ապա դրանց վրա պետությունն է ուշադրություն դարձնում, սակայն պետք է նշել՝ ոչ միշտ: Հենց հիմա մենք կարող ենք ուղեւորվել շուկա եւ խանութներ, եւ ես ձեզ ցույց կտամ թուրքական ապրանքները՝ սխալ պիտակավորմամբ: Իսկ սա նշանակում է, որ կասկածելի կարող է լինել նաեւ ապրանքների բաղադրությունը», - ավելացրեց Պիպոյանը:
