Նոր մանրամասներ են հայտնի դարձել Սթոքհոլմում ռումբ պայթեցնելու սպառնալիք հնչեցրած Իսրայելի եւ Հայաստանի քաղաքացու մասին, որը Շվեդիայում դատապարտվել է երկու տարվա ազատազրկման եւ արտաքսվել երկրից: «Jewish Journal»-ը գրում է, որ 43-ամյա տղամարդու անունն է Ամրամ Իվրի:
Հունիսի 19-ի տղամարդը մտել է փախստականների հետ աշխատող տեղի ոչ առեւտրային կազմակերպություն եւ սպառնացել պայթեցնել իրեն, քանի որ Շվեդիայի Միգրացիոն ծառայությունը մերժել էր ապաստան տալու հարցում: Նա ասել էր, որ իր գոտուն պայթուցիկ է ամրացված, որն իրականում իսկական չէր: Նաեւ սպառնացել էր պայթեցնել եւս երկու ռումբ Շվեդիայի երկու խոշոր կուսակցությունների՝ սոցիալ-դմոկրատների եւ չափավորների գրասենյակներում:
Մամուլում չի նշվում` արդյոք Իվրին հրեա է, որի անունն այդ լեզվով նշանակում է «հրեական», եւ թե ինչու է նա ապաստան փնտրել Շվեդիայում: Իվրին նախկինում եղել է Հայաստանի քաղաքացի, չնայած պնդում է, որ հրաժարվել է իր հայկական անձնագրից մի քանի տարի առաջ` Մոսկվայում:
NEWS.am-ը հայտնել էր, որ հունիսին Սթոքհոլմում ռումբ պայթեցնելու սպառնալիք հնչեցրած տղամարդը 2 տարվա ազատազրկման էր դատապարտվել, այնուհետեւ արտաքսվել կեղծ տագնապի եւ ծանրացուցիչ հանգամանքներում քրեական սպառնալիքների համար: 43-ամյա տղամարդը, որը, ըստ տեղեկությունների, երկքաղաքացիություն ունի՝ Հայաստանի եւ Իսրայելի, Շվեդիա էր մեկնել ապրիլին՝ «ընկերոջը այցելելու» եւ ապաստան էր խնդրել: Փաստաբանի խոսքով՝ նա մերժվել էր եւ հայտարարել, որ Միգրացիոն ծառայությունը վատ է վարվել իր հետ:
