Եթե Ուկրաինայի հետ դիմադրության ընթացքում պուտինյան Ռուսաստանը զինված ուժեր օգտագործի, ապա Հայաստանի դեպքում կօգտագործի Բաքվին՝ որպես «կատաղած շան»: Այսօր՝ հուլիսի 31-ին, մամուլի ասուլիսին նման կարծիք հայտնեց նախագահի նախկին թեկնածու, «Ազգային ինքնորոշում» միավորման նախագահ Պարույր Հայրիկյանը՝ համեմատելով Հայաստանի եւ Ուկրաինայի քաղաքական գործընթացները:
«Սակայն դա մեզ չպետք է վախեցնի: Հակառակը, հետեւելով այն ամենին, ինչ տեղի է ունենում Ուկրաինայում, Հայաստանի իշխանությունները պետք է ճիշտ հանգումներ անեն եւ համապատասխան քայլեր ձեռնարկեն», - նշեց Հայրիկյանը:
Անդրադառնալով Ուկրաինայում սրացող ճգնաժամին՝ Հայրիկյանն ընդգծեց, որ չնայած մարդկային կորուստներին, երկիրը անպայմանորեն հաղթանակած դուրս կգա այս իրավիճակից, քանի որ ուկրաինացիները պայքարում են ճշմարտության եւ ազատ ընտրության իրացման իրավունքի համար:
«Մենք պետք է հասկանանք, որ հիմա պետք է տանենք ժամանակավոր դժվարությունները,արժանի ապագա ունենու համար», - եզրափակեց Հայրիկյանը՝ եւս մեկ անգամ պնդելով, որ հանրապետությունը կրկին պետք է եվրոպական զարգացման ուղղություն վերցնի:
Լուսանկարը՝ Արսեն Սարգսյանի/NEWS.am