Ամերիկյան Մասաչուսեթս նահանգում ավտոմեքենայի ուղեւորին մի կերպ հաջողվել է փրկվել մահից այն բանից հետո, երբ կացինը կոտրել է դիմապակին եւ մեխվել վահանակին: Այդ մասին գրում է բրիտանական «The Daily Mirror» թերթը:
Մասաչուսեթս նահանգի ոստիկանության հրապարակած լուսանկարներում երեւում է , թե որքան մոտ է գտնվել ուղեւորին կացինը: Ոստիկանի խոսքով՝ կացինը պոկվել է բեռնատարից ու հարվածել մեքենային, որը հետեւից էր ընթանում: Ուղեւորը ցնցվել է, երբ հրաշքով փրկվել է: Բեռնատարի վարորդը պատասխանատվության է ենթարկվել բեռն անվտանգությամբ չապահովելու համար:
Նահանգի ոստիկանությունը գովել է մեքենայի վարորդին արագության սահմանափակմանը հետեւելու համար: «Տղամարդը, ում մեքենան վնասվել էր, հետեւել էր սահմանված արագությանը եւ վարում էր ժամում 100 կմ արագությամբ: Եթե նա ավելի արագ ընթանար, ապա գերեզանցված արագությունը կմեծացներ կացնի հարվածի ուժը, ինչն էլ կարող էր վնասել ուղեւորին»,- նշել են ոստիկանությունում:
