Տավուշի մարզի սահմանամերձ Բերքաբեր գյուղը հուլիսի 31-ի լույս օգոստոսի 1-ի գիշերը նորից գնդակոծության է ենթարկվել. ժամը 04:00-ից մինչեւ 08:00-ն հակառակորդը կրակել է: Այս մասին NEWS.am-ին ասաց համայնքի ղեկավար Արթուր Մադաթյանը:
«Բարեբախտաբար վիրավորներ ու զոհեր չունենք, միայն նյութական վնասներ են. փամփուշտներն ընկել են մարդկանց տները: Էլ զենք չմնաց, որով ադրբեջանական կողմը չկրակի»,- ասաց գյուղապետը:
Արթուր Մադաթյանի խոսքով՝ հակառակորդը կրակել է տների, այգիների եւ միջպետական ճանապարհի ուղղությամբ:
Պաշտպանության նախարարի մամուլի խոսնակ Արծրուն Հովհաննիսյանն էլ NEWS.am-ին ասաց, որ իսկապես ադրբեջանական կողմը գիշերը կրակել է Տավուշի մարզի սահմանամերձ գյուղերի ուղղությամբ, սակայն վտանգավոր ոչինչ չկա:
