«Հրազդանի էներգետիկ կազմակերպություն /ՀրազՋԷԿ/» բաց բաժնետիրական ընկերությունն ընթացիկ տարվա հունվարի 1-ից հուլիսի 30-ն ընկած ժամանակահատվածում շուրջ 450 մլն. մլն կՎտ/ժամ էլեկտրաէներգիա է թողարկել, ինչը 3.5 անգամ գերազանցում է ընթացիկ տարվա պլանային ցուցանիշը եւ 60 տոկոսով`անցյալ տարվա նույն ժամանակահատվածի ցուցանիշը:
Այս տարվա միայն հունիս-հուլիս ամիսներին կայանն արտադրել է շուրջ 120 մլն. կՎտ/ժ էլեկտրաէներգիա` ծածկելով երկրի ներքին պահանջարկի ավելի քան 15 տոկոսը:
ՀրազՋԷԿ-ը (I-IV էներգաբլոկները) Հայաստանի էլեկտրաէներգետիկական համակարգի հավասարակշռող արտադրող կայանն է, որը գործարկվում է միայն համակարգում ծագող էլեկտրաէներգիայի պակասորդի պայմաններում:
«Այլ արտադրող կայանների նորոգումների ու վերալիցքավորման կամ հնարավոր արտակարգ իրավիճակներով պայմանավորված` համակարգում էլեկտրաէներգիայի պակասորդ կարող է ծագել ցանկացած ժամանակ, - ասում է «ՀրազՋԷԿ» ԲԲԸ գլխավոր ճարտարագետ Արտաշես Մնացականյանը, - ուստի կայանը մշտապես` ամառ թե ձմեռ, գիշեր թե ցերեկ, պետք է պատրաստ լինի օպերատիվ թողարկման: Այս տարվա փորձը ցույց տվեց, որ թողարկման անհրաժեշտություն կարող է ծագել անգամ հունիս-հուլիս ամիսներին»:
Հիշեցնենք, որ «ՀրազՋԷԿ» ԲԲԸ-ն հանդիսանում է ռուսաստանյան «Ինտեր ՌԱՕ» ընկերության դուստր ձեռնարկություն: Կայանի դրվածքային հզորությունը կազմում է 1100 ՄՎտ: 2013թ. կայանն արտադրել է Հայաստանում սպառված էլեկտրաէներգիայի ամբողջ ծավալի շուրջ 15 տոկոսը:
