Օրերս վիճաբանություն է տեղի ունեցել Արմավիրի մարզի Հայկաշեն գյուղում, որն ավարտվել է կրակոցներով ու վնասվածքով: NEWS.am-ի տեղեկություններով, վեճը ծագել է Հայէլեկտրոցանցի «Մուսալեռ» մասնաճյուղի պատասխանատուի եւ գյուղացիների միջեւ:
Գյուղացիներից մեկը իր մոտ եղած հրացանից կրակոց է արձակել «Մուսալեռ» մասնաճյուղի պատասխանատուի ուղղությամբ եւ վիրավորել վերջինիս: Վեճը տեղի է ունեցել օգոստոսի 16-ի երեկոյան, գյուղի բնակիչներից մեկի հողամասում տեղադրված զրուցարանում գյուղի լուսավորության թեմայի շուրջ: Երբ թեժացել է վիճաբանությունն ու հասել փոխադարձ հայհոյանքների, վիրավորանքների, մասնակիցներից մեկը իր որսորդական հրացանից կրակել է նրա ոտքին` պատճառելով հրազենային վնասվածք: NEWS.am-ի տեղեկություններով, կրակողը դիմել է փախուստի, իսկ տուժողին տեղափոխել են Վաղարշապատի հիվանդանոց:
