Դեռեւս Բաքվի շուկայում չենք գտնվում եւ առեւտրով չենք զբաղվում: Այս մասին Facebook-ի իր էջում գրել է պաշտպանության նախարարի մամուլի քարտուղար Արծրուն Հովհաննիսյանը՝ մեկնաբանելով Ադրբեջանի փախստականների եւ հարկադիր վերաբնակեցվածների հարցերով պետական կոմիտեի նախագահ Ալի Հասանովի խոսքերը:
«Մենք խստորեն պահպանում ենք մարդասիրական հումանիտար սկզբունքները եւ նախապայմաններ չենք ներկայացնում ու ընդունում։ Ուղղակի հարգելով Կարմիր խաչի կազմակերպության ջանքերը այդ ուղղությամբ պարբերաբար դիմում ենք վերջինիս աջակցությանը ՀՀ եւ ԼՂՀ քաղաքացիների վերադարձը կազմակերպելու համար։ Ադրբեջանի տվյալ պաշտոնյայի հայտարարությունը գռեհիկ ապատեղեկատվություն է», - գրել է Հովհաննիսյանը:
Նշենք, ադրբեջանական մամուլը, վկայակոչելով Ադրբեջանի պաշտպանության փոխնախարար, Փախստականների եւ հարկադիր վերաբնակեցվածների հարցերով պետական կոմիտեի նախագահ Ալի Հասանովի խոսքերը, տեղեկություն էր տարածել, որ Ադրբեջանի ՊՆ-ն Հայաստանի պաշտպանական գերատեսչությանն առաջարկել է 5 հոգանոց հայկական ընտանիքը եւ սպանված Կարեն Պետրոսյանի մարմինը փոխանակել ադրբեջանցի դիվերսանտներ Շահբազ Գուլիեւի եւ Դիլհամ Ասկերովի եւ Հասան Հասանովի մարմինների հետ:
Հիշեցնենք, Չինարիի բնակիչ Կարեն Պետրոսյանը գերեվարվել էր օգոստոսի 7-ին: Հաջորդ օրը ադրբեջանական կողմը տեղեկություն էր տարածել գերու մահվան մասին՝ պատճառն անվանելով «սրտային անբավարարությունը»:
