Երեւանում սեպտեմբերի 9-ին, ժամը 13:15-ին բողոքի երթ է կայանալու՝ «ընդդեմ Մաքսային միությանն ու Եվրասիական տնտեսական միությանը Հայաստանի բռնակցման»: Այս մասին տեղեկացնում է ակցիան իրազեկման նպատակով ստեղծված ֆեյսբուքյան էջը:
«Բոլորս քաջ գիտակցում ենք, որ ի սկզբանե խախուտ եւ անհեռանկար «Մաքսային միություն» ռուսական նախագծին Հայաստանի անդամակցելը հերթական անգամ մեր երկիրը դարձնում է միջոց ու գործիք ռուսական չարյաց կայսրության ձեռքին, եւ մեր երկիրը Ռուսաստանն օգտագործելու է իր կայսերական նկրտումներն ու հավակնությունները բավարարելու համար։ Մաքսային միությունն այն շղարշն է, որի տակ ռուսական դիվանագիտությունը կլուծի իր համար շահավետ խնդիրներ»,- մասնավորապես ասվում է հայտարարության մեջ:
Ֆեյսբուքյան նախաձեռնությունն ակցիայի անցկացման օր ընտրել է սեպտեմբերի 9-ը, քանի որ սեպտեմբերի 8-9-ը նախանշված է Ռուսաստանի վարչապետ Դմիտրի Մեդվեդեւի այցը Հայաստան: Կազմակերպիչներն առաջարկում են հավաքվել Ազատության հրապարակում եւ շարժվել դեպի կառավարության շենք՝ «ցույց տալով մեր անհնազանդությունն ընդդեմ չարիքի կայսրության»: