Հայաստանի Հանրապետության նախագահին առընթեր սահմանադրական բարեփոխումների մասնագիտական հանձնաժողովը մինչեւ հոկտեմբերի 15-ը Սերժ Սարգսյանին կներկայացնի հայեցակարգը: Այս մասին NEWS.am-ին ասաց սահմանադրագետ, մասնագիտական հանձնաժողովի անդամ Վարդան Պողոսյանը:
«Սեպտեմբերի 19-ին մենք պատրաստվում ենք Սահմանադրական բարեփոխումների նախագիծը ներկայացնենք Վենետիկի հանձնաժողովին, որն էլ իր հերթին հոկտեմբերի 10-11-ին հարցը կքննարկի Հռոմում կայանալիք հանդիպման ժամանակ: Դրանից հետո արդեն մինչեւ հոկտեմբերի 15-ը հայեցակարգը կներկայացվի նախագահին եւ բաց կլինի նաեւ հանրության համար»,- ասաց նա՝ ավելացնելով, որ ժամկետների փոփոխություն այլեւս չի լինի:
Թե ինչ բովանդակություն ունի հայեցակարգը, Վարդան Պողոսյանը հրաժարվեց հայտնել՝ մեկնաբանելով, թե այս պահին դեռ աշխատանքներ են տարվում եւ վերջնական որոշում դեռեւս չի կայացվել:
Նշենք, որ Սահմանադրական բարեփոխումներին այս պահին խորհրդարանական ուժերից միայն ՀՅԴ-ն է կողմ արտահայտվել: Քաղաքական մյուս ուժերից ԲՀԿ- եւ ՀԱԿ-ը կտրուկ դեմ են արտահայտվել բարեփոխումներին՝ տարբեր պատճառներով: ԱԺ ԲՀԿ խմբակցության պատգամավոր Ստեփան Մարգարյանը համոզված է, որ հիմա տնտեսական բարեփոխումների ժամանակն է, ոչ թե՝ Սահմանադրական: ՀԱԿ խմբակցության ղեկավար Լեւոն Զուրաբյանն այս առթիվ նշել է, որ իշխանությունները չգիտեն, թե ինչ են ուզում: «Ժառանգություն» խմբակցության ղեկավար Ռուբիկ Հակոբյանը չի շտապում կարծիք հայտնել: Նրա խոսքով՝ Սահմանադրական բարեփոխումների հայեցակարգի նախագիծը պետք է ամբողջությամբ եւ մանրամասն ուսումնասիրել, այնուհետեւ՝ գնահատականներ տալ: «Օրինաց երկիր» խմբակցությունը նույնպես դեմ է Սահմանադրական բարեփոխումներին:
Սահմանադրական բարեփոխումներին անդրադարձել են նաեւ Հայաստանի առաջին եւ երկրորդ նախագահները՝ նորից դեմ արտահայտվելով սպասվող բարեփոխումներին:
