Լեհաստանի վարչապետ Դոնալդ Տուսկը սեպտեմբերի 2-ին Բրյուսելում ԵՄ-ի գագաթաժողովի ժամանակ ընտրվել է Եվրոպական խորհրդի նախագահ: Այս մասին Twitter-ի իր միկրոբլոգում հայտնել է Հերման Վան Ռոմպեյը, որին Տուսկը կփոխարինի նախագահի պաշտոնում:
Գագաթաժողովում նաեւ նշանակվել է եվրոպական դիվանագիտության նոր ղեկավար՝ Քեթրին Էշթոնին փոխարինել է Իտալիայի արտգործնախարար Ֆեդերիկա Մոգերինին:
Գագաթաժողովից առաջ Ուկրաինայի արտգործնախարար Պավել Կլիմկինը իր Twitter-ում գրել է. «Բրյուսելի միջանցքներում կատակում են, որ Տուսկի նշանակումը Ռուսաստանի դեմ ոչ մեծ պատժամիջոց կդառնա»:
Տուսկն ինքը խոստացել է, որ առաջնահերթ անգլերեն կսովորի, ինչը գրեթե չգիտի: Ուկրաինայի մասով նա խոստացել է վճռական գործել, բայց խելամիտ, փոխանցում է rbc-ն:
Նշենք, ԵՄ առանցքային պաշտոններում նոր ղեկավարներ նշանակելը Բրյուսելի գագաթաժողովի օրակարգի հարցերից մեկն էր միայն: Մյուս հարցը Ռուսաստանի դեմ պատժամիջոցների ընդլայնումն է: Գագաթաժողովի կուլուարներում Ֆինլանդիայի վարչապետ Ալեքսանդր Ստուբը հայտնել է, որ Մոսկվայի նկատմամբ սահմանափակող միջոցառումները կվերաբերեն ֆինանսական հատվածին, էներգետիկ տեխնոլոգիաներին եւ զենքի մատակարարումներին: Ստուբը միաժամանակ նշել էր, որ ամենայն հավանականությամբ պատժամիջոցները նոր բնագավառներ չեն ընդգրկի:
