![](img/news/22/67/76/default.jpg)
Երեւանի քաղաքապետարանը գրավոր զգուշացրել է 17 երթուղիներ սպասարկող 11 կազմակերպություններին, որ 15 օրվա ընթացքում վերացնեն թերությունները, հակառակ դեպքում իրենց երթուղայիններին կարգելեն աշխատել: Այս մասին NEWS.am-ին ասաց քաղաքապետարանի տրանսպորտի վարչության պետ Հենրիկ Նավասարդյանը՝ մեկնաբանելով վերջին 2 օրերին երթուղայինների գերծանրաբեռնված աշխատելը:
«Այս երկու օրերին իրավիճակը վերահսկվում է եւ պետք է ասել, որ այնպես չէ, որ ուղեւորը ստիպված է 30-40 րոպե սպասել երթուղայինին: Իհարկե, դժվարություններ կան, նախ որովհետեւ առավոտյան ժամերին մարդիկ միանգամից փողոց են դուրս գալիս, երկրորդ՝ խցանումների պատճառով վարորդները չեն հասցնում իրենց միջակայքի մեջ տեղավորվել: Դեռ օգոստոսի 25-ին բոլոր ուղեւորափոխադրող կազմակերպությունների ներկայացուցիչների հետ հանդիպում ենք ունեցել եւ պահանջել ենք, որ ապահովեն մեքենաներով եւ վարորդներով: 11 կազմակերպության զգուշացրել ենք, որ հատկապես վարորդների պակասի հարցը լուծեն: Իրականում, մենք հենց վարորդի խնդիր ունենք, ոչ թե մեքենայի»,- ասաց նա:
Հարկ է նշել, որ սեպտեմբերի 1-ից երթուղայիններն աշխատում են գերծանրաբեռնված: Առավոտյան ժամերին գրեթե բոլոր կանգառներում կարող ենք հանդիպել մարդկանց, ովքեր ամեն կերպ փորձում են «խցկվել» երթուղայինի մեջ: