ՀՅԴ-ի՝ հանրահավաքին մասնակցությունից հրաժարումը որոշակի աջակցություն է Հայաստանի ներկայիս իշխանություններին: Այդ մասին այսօր՝ սեպտեբերի 18-ին, մամուլի ասուլիսի ժամանակ հայտարարեց «ժառանգություն» կուսակցության փոխնախագահ Արմեն Մարտիրոսյանը:
Արմեն Մարտիրոսյանը հավելեց, որ նրանք դեռ վերջնական պատասխան չունեն՝ իշխանությունը կհամաձայնի՞ իրենց առաջարկությունների հետ, թե՞ ոչ: «ՀՅԴ-ի տվյալ քայլը որոշակի աջակցություն է իշխանություններին, սակայն եթե իշխանությունները չընդունեն ՀՅԴ-ի առաջարկությունը, վերջինս նույնպես դեմ հանդես կգա սահմանադրական բարեփոխումներին», - նշեց Արմեն Մարտիրոսյանը: Նա հստակերեց, որ անհրաժեշտ են ապացույցներ, որ Սահմանադրությունը իշխանության վերարտադրման գործիք չի դառնա:
Հիշեցնենք, որ հոկտեմբերի 10-ին Ազատության հրապարակում տեղի կունենա երեք խորհրդարանական ուժերի՝ԲՀԿ-ի, ՀԱԿ-ի եւ «Ժառանգության» հանրահավաքը: ՀՅԴ-ն չի մասնակցի հանրահավաքին, քանի որ կողմ է Հայաստանում Սահմանադրական բարեփոխումներին: Այդ կարծիքը չեն կիսում մնացյալ երեք ուժերը:
