Իրաքի վարչապետ Հեյդար ալ Աբադին կարգադրել է Սիրիայի սահմանին գտնվող Անբար նահանգում ազգային գվարդիա ստեղծել: Այս հրամանը երկրում ազգային գվարդիայի ստորաբաժանում ստեղծելու առաջին քայլն է, որտեղ «Իսլամական պետության» գրոհայինները կարողացել են գրավել տարածքի գրեթե մեկ երրորդ մասը եւ այժմ Իրաքի խաղաղ բնակչությանը սպառնում են քիմիական զենքով, փոխանցում է ԻՏԱՌ-ՏԱՍՍ-ը:
Ազգային գվարդիա ստեղծելու վերաբերյալ որոշումն ընդունվել է երեկ, եւ հինգշաբթի այդ մասին «Աս Սումարիա» հեռուստաալիքին հայտնել է նահանգի խորհրդի ղեկավար Սաբահ Քերհութը:
Չորեքշաբթի Քերհութի գլխավորությամբ պատվիրակությունը բանակցություններ էր վարել ալ Աբադիի հետ, որի արդյունքում վերջինս հավանություն էր տվել նահանգի խորհրդի խնդրանքին. նրա ներկայացուցիչները կարծում են, որ ազգային գվարդիայի ձեւավորումը կնպաստի ԻՊ-ն արմատախիլ անելուն: Քննարկվում է նաեւ ոստիկանությանը եւ բանակին հավելյալ սպառազինություն տրամադրելու հարցը:
Ազգային գվարդիայի ձեւավորումը սեպտեմբերի 8-ին իր պարտավորությունները ստանձնած ալ Աբադիի կառավարության գլխավոր խնդիրներից է:
