Այն, որ Հայաստանի՝ Եվրասիական տնտեսական միությանը միանալը եռյակի համար ամենառաջնային գործը չէ, մնում է ցավով արձանագրել, որ եռյակը Հայաստանի օրակարգի հետ կապ չունի: Այս մասին NEWS.am-ի թղթակցի հետ զրույցում ասաց ԱԺ «Ժառանգություն» խմբակցության նախկին պատգամավոր, փորձագետ Ստեփան Սաֆարյանը:
«Ցավով պետք է արձանագրեմ եւ մտահոգութամբ, որ եռյակը նման կերպ ոչ թե անտարբեր է, այլ ընդհուպ կողմ է Եվրասիական տնտեսական միությանը միանալուն, այլապես որպես քաղաքական ուժ՝ առնվազն կփորձեր հոկտեմբերի 10-ին կանխել այդ ամեն ինչը, իսկ չանելով դա եւ լռության մատնելով՝ նշանակում է, որ եռյակը այդպիսի նպատակ չունի էլ, նպաստում է Հայաստանի հերթական պետական փլուզմանը: Ցավով պետք է արձանագրել, որ Հայաստանի ընդդիմության գեներացման գործընթացը ռուսական ազդեցությունների դաշտում է»,-ասաց նա:
Հիշեցմանը, թե ձեր հարազատ «Ժառանգությունը» եւս եռյակի անդամ է, Ստեփան Սաֆարյանն ասաց, որ ցավով է վերաբերում այդ հանգամանքին, բայց այդ հարցի պատասխանը պետք է տա «Ժառանգության» վարչությունը, իսկ ինքը՝ ընդամենը որպես փորձագետ, գնահատում է փաստերը:
Հիշեցնենք, որ օրերս ՀԱԿ խմբակցության ղեկավար Լեւոն Զուրաբյանը՝ անդրադառնալով Հայաստանի՝ ԵՏՄ անդամակցությանը, ասել էր. «Սա ընդհանրապես ամենակարեւոր հարցը չէ», որ իրենց համար կարեւորը օրինական իշխանության ձեւավորումն է: Նկատենք սակայն, որ եռյակը իշխանափոխության հարց եւս չի բարձրացնում:
