Ազգային ժողովի փոխնախագահ, ՀՀԿ մամուլի խոսնակ Էդուարդ Շարմազանովը համոզված է, որ ՀԱԿ-ը գոյություն չունի, հակառակ դեպքում համատեղ հանրահավաքներին Կոնգրեսի ամենաառանցքային դեմքերը՝ Նիկոլ Փաշինյանն ու Հրանտ Բագրատյանը, ներկա կլինեին:
«Նույնը վերաբերում է Ալեքսանդր Արզումանյանին, Հովհաննես Իգիթյանին, Արամ Զավենի Սարգսյանին, Պետրոս Մակեյանին, Դավիթ Շահնազարյանին, Կարապետ Ռուբինյանին, որոնց հետ եղել են գաղափարական պայքարի մեջ 2008-2011թթ.: ՀԱԿ-ի առյուծի բաժինը դուրս է եկել այնտեղից: Այնտեղ մնացել է Լեւոն Տեր-Պետրոսյան քաղաքական թոշակառուն` իր 2-3 հավատարիմներով»,- այսօր՝ սեպտեմբերի 27-ին, լրագրողների հետ զրույցում ՀԱԿ-ի գործունեության մասին այսպիսի կարծիք հայտնեց ՀՀԿ խոսնակը:
Նրա խոսքով՝ ՀԱԿ-ը «պլինդուզ»-ից ցածր է, հետեւաբար իշխող կուսակցությունը չի պատրաստվում որեւէ կերպ պատասխանել ՀԱԿ քարտուղար Արամ Մանուկյանի վիրավորական արտահայտություններին:
«Ինձ համար անլուրջ է, որ մազերը սպիտակ մարդը, որը կարդացել է ՀՀ Անկախության հռչակագիրը, հազարավոր մարդկանց դեմը կանգնում ու հայհոյում է ու դրանից իրեն իրավունք վերապահի, ասի ՀՀԿ պատգամավորի` այս կետը խախտո՞ւմ ես: Կներեք, եթե ես անբարոյականություն եմ անում, ես իրավունք չունեմ ուրիշին մեղադրեմ, որ ինքն անբարոյական է»,- ավելացրեց Շարմազանովը: