Ներկայումս Եվրասիական ինտեգրացիան ուշացնող օբյեկտիվ պատճառներ կան. Այս գործընթացը պետք է ամրագրվի հայ-ռուսական երկկողմ դաշնակցային հարաբերությունների ամրապնդմամբ: Այս մասին սեպտեմբերի 29-ին Երեւան-Մոսկվա հեռուստակամրջի ընթացքում հայտարարել է Հասարակաքաղաքական հետազոտությունների կենտրոնի տնօրեն, ռազմական փորձագետ Վլադիմիր Եվսեեւը:
Ըստ նրա` եվրասիական անդամակցության գործընթացը լրջորեն կախված կլինի այն բանից, թե ինչպես կզարգանան իրադարձություններն Ուկրաինայի շուրջ: Եվսեեւը նշել է, որ այդ անդամակցությանը բավական զգույշ է սկսել վերաբերվել Ղազախստանը: «Ներկայումս լուրջ խնդիրներ կան Ռուսաստանի եւ Ղազախստանի միջեւ, եւ ռուս-ղազախական հարաբերությունների բեկման մասին խոսելը սխալ կլիներ», - ընդգծել է փորձագետը: Նա հավելել է, որ միաժամանակ ՉԺՀ-ն նույնպես սկսոմ է իր ինտեգրման նախագծերը, եւ այդ պայմաններում ԵՏՄ-ն պետք է պաշտպանի իր շահերը: «Ես չէի ասի, որ ԵՏՄ-ն արագ կզարգանա», - նշել է փորձագետը: Խոսելով ռուս-հայկական հարաբերությունների մասին` Վլադիմիր Եվսեեւն ընդգծել է. «Ռուսաստանի եւ Հայաստանի միջեւ հարաբերությունները սկզբունքային են. մենք պետք ենք միմյանց՝ եւ ոչ միայն տնտեսական առումով»:
Հիշեցնենք, որ այս տարվա հոկտեմբերի 10-ին Մինսկում հնարավոր է ԵՏՄ-ին Հայաստանի միացման պայմանագրի ստորագրումը: