Դահլիճում բացակայող պատգամավորների փոխարեն քվեարկելը ավելի լուրջ խախտում է, քան նույնիսկ ոչ սթափ խորհրդարան մտնելը: Այդ մասին այսօր՝ սեպտեմբերի 29-ին, հայտարարեց «Ժառանգություն» պատգամավորական խմբակցության քարտուղար Թեւան Պողոսյանը՝ մեկնաբանելով «Ազգային ժողովի կանոնակարգի մասին» օրենքում փոփոխությունները:
Նրա խոսքով՝ եթե քննարկումները բարձր ձայներով են անցնում, պատգամավորները հետո էլ կարող են քննարկել պատահածը եւ որոշել՝ ով է ճիշտ, եւ ով մեղավոր: «Եղել են նաեւ դեպքեր, երբ մարդիկ ոչ սթափ վիճակում եկել են դահլիճ, հայտարարություններ արել, որոնք դահլիճից դուրս, փողոցում բոլորովին այլ հետեւանքներ կարող էին ունենալ: Սակայն այստեղ կա սկզբունքային տարբերություն՝ քվեարկության վրա այդ խախտումները չեն ազդում: Եվ հենց դա էլ օրենքին կյանք է տալիս: Ուստի շատ լուրջ են դրանց խախտումները: Եվ մենք պետք է ցույց տանք՝ որքան ենք հարգում քվեարկությունը՝ որպես օրենսդրական իշխանության ինստիտուտ», - հայտարարեց Պողոսյանը:
Նրա կարծիքով, կարեւորը նման խախտումների պատժի ծանրությունը չէ: Ավելի գործնական մոտեցում է պետք. տեղում ապահովել խախտումները որոշելու հնարավորությունըեւ կրկնակի քվեարկություն անցկացնել:
