«Շրջանառության հարկի մասին» նոր օրենքի դեմ բողոքող՝ Երեւանի տոնավաճառների աշխատակիցները «ամոթ, դավաճան» վանկարկումներով եւ սուլոցներով դիմավորեցին Ազգային ժողովի շենքից դուրս եկող պատգամավորներին, կարծելով, թե նրանք ՀՀԿ-ական պատգամավորներն են, որոնք այսօր՝ սեպտեմբերի 30-ին, տապալել էին ոչ իշխանական ուժերի ջանքերով հրավիրված արտահերթ նիստը:

Նշենք, որ ինչպես կանխատեսում էին ընդդիմադիր պատգամավորները, արտահերթ նիստին քվորում չի ապահովվել, անհրաժեշտ 66 պատգամավորի փոխարեն գրանցվել է ընդամենը 37-ը:

Այնուամենայնիվ, պարզվեց, որ դրանք ոչ իշխանական 5 կուսակցությունների (ՕԵԿ-ը նույնպես միացել է նախաձեռնությանը) ներկայացուցիչներն են, որոնք ասացին, որ կդիմեն Սահմանդրական դատարան՝ բողոքելու ՀՀԿ պատգամավորների անգործության դեմ: Նրանք նշեցին, որ հնարավոր է՝ վաղը նույնպես ստորագրահավաք անցկացնեն եւ արտահերթ նիստ հրավիրեն: Պատգամավորները առեւտրականներին հորդորեցին վաղը՝ 15:30-ին՝ Ազգային ժողովում հարցուպատասխանի ժամանակ նույնպես հավաքվել խորհրդարանի շենքի դիմաց եւ պատասխան պահանջել ՀՀԿ պատգամավորներից:

Հիշեցնենք, որ արտահերթ նիստին պետք է քննարկվեր ԲՀԿ պատգամավոր Միքայել Մելքումյանի ներկայացրած օրենքի նախագիծը, որով առաջարկվում է փոփոխություններ մտցնել «Շրջանառության հարկի մասին» հոկտեմբերի 1-ից ուժի մեջ մտնող նոր օրենքում:

Նշենք, որ Միքայել Մելքումյանի մշակած՝ «Շրջանառության հարկի մասին» օրենքի փոփոխությունների համաձայն՝ առաջարկվում է շրջանառության հարկին ենթակա տնտեսվարող սուբյեկտների տարեկան շրջանառությունը 58.35 միլիոն դրամից բարձրացնել մինչեւ 150 միլիոն դրամ։ Եվ երկրորդ՝ նախատեսվում է ներմուծել «Շրջանառության հարկի մասին» օրենքում կամավորության սկզբունք: Դա նշանակում է, որ այն տնտեսվարող սուբյեկտները, որոնք կցանկանան 1% հարկ վճարել եւ շրջանառությունը ցույց տալ, այդպես կաշխատեն, իսկ այն տնտեսվարողները, որոնք կցանկանան աշխատել 3.5% հարկով՝ առանց շրջանառության մասին հարկային մարմնին տեղեկացնելու, այդպես կաշխատեն:

Հիշեցնենք, որ 2014թ. հոկտեմբերի 1-ից ուժի մեջ է մտնում «Շրջանառության հարկի մասին» ՀՀ օրենքը, ըստ որի տոնավաճառների աշխատողները իրենց ապրանքաշրջանառության վերաբերյալ փաստաթղթեր պետք է ներկայացնեն հարկային մարմնին։ Նոր փոփոխությամբ՝ առաջին անգամ փաստաթուղթ չներկայացնելու դեպքում ձեռնարկությունը նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: Կառավարությունը նոր օրենքը հիմնավորում է խոշոր բիզնեսը հարկային դաշտ բերելու անհրաժեշտությամբ։