Երեւանի Այգեստան 167 տան մոտ, դեպի Սարալանջ տանող նոր ճանապարհին սեպտեմբերի 30-ին հնչած կրակոցներից վիրավորված 21-ամյա Լեւոն Հարությունյանը «Շարլոտի» սեփականատիրոջ եղբոր որդին է, հայրը՝ Արամ Հարությունյանը, այդ ակումբի հետ որեւէ կապ չունի: Այս մասին NEWS.am-ին հայտնեցին վիրավորվածի հարազատները:
Նրանց փոխանցմամբ՝ դեռ հայտնի չէ, թե ինչու են Լեւոնի վրա կրակել, սակայն հերքեցին տեղեկությունները, թե աղջկա պատճառով է եղել:
«Ուզում են գործը կոծկել, երեւի դրա համար են նման տեղեկություններ տարածում համապատասխան մարդիկ»,- ասաց մեր զրուցակիցը:
Նշենք, որ Լեւոնի հայրը մասնակից է եղել օգոստոսի 26-ին «Շարլոտում» տեղի ունեցած վիճաբանությանն ու ծեծկռտուքին: Հենց այս պատճառով էլ հարազատները կարծում են, որ հնչած կրակոցներն այդ միջադեպի շարունակություն է:
NEWS.am-ի տեղեկություններով՝ Կենտրոնի հարկայինի պետն ու այլ բարձրաստիճան պաշտոնյաներ հենց Լեւոնի հոր հետ են ակումբում վեճի բռնվել, հայհոյել, 7 հոգով ծեծի ենթարկել:
Հիշեցնենք, որ օգոստոսի 26-ի գիշերը Բաղրամյան պողոտայում գտնվող «Շարլոտ» գիշերային ակումբում վիճաբանություն ու ծեծկռտուք էր տեղի ունեցել ակումբի տերերի ու հաճախորդների միջև: Հաճախորդների մեջ են եղել Կենտրոնի հարկայինի պետը, նաեւ ԱԱԾ աշխատակից: Վերջիններս դեպքից օրեր անց աշխատանքից ազատվեցին: Ըստ լրատվամիջոցների՝ մասնակիցների մեջ է եղել նաեւ ֆինանսների նախարարի որդին:
Ավելի վաղ NEWS.am-ը հայտնել էր, որ Սարալանջում մի մեքենայից կրակոցներ են հնչել մյուսի ուղղությամբ, որի մեջ գտնվողը ոտքին ստացել է վնասվածք: Երթեւեկության ընթացքում «Ռենջ Ռովեր» մակնիշի մեքենայի ուղղությամբ կրակոցներ են արձակել ու դիմել փախուստի: Թե ինչ պատճառով է վեճը ծագել, դեռ հայտնի չէ: Դեպքի վայրից հայտնաբերվել են պարկուճներ: Լեւոն Հարությունյանը տեղափոխվել է հիվանդանոց, ստացել բուժօգնություն եւ դուրս գրվել:
