Վրաստանի Քոբուլեթի քաղաքում օգոստոսի 16-ին Սամվել Խառատյանի եւ վրացի մոտոցիկլավարի մասնակցությամբ տեղի ունեցած վթարի գործով նախաքննությունը շարունակվում է:
«Փորձաքննություններ են նշանակվել, որոնց պատասխանները դեռ չկան: Ոչ մեկին մեղադրանք չի առաջադրվել, ինքս էլ վկայի կարգավիճակում եմ, սպասում ենք փորձաքննությունների եզրակացություններին: Նախնական տվյալով մոտոիկլավարն է մեղավոր եղել, նա գերազանցել է արագությունն ու մեքենան վարել 250 կմ/ժ արագությամբ»,- NEWS.am-ին ասաց Սամվել Խառատյանը, որը Քոբուլեթի էր գնացել ընտանիքի հետ :
Նշենք, որ վթարի հետեւանքով մահացել էր Սամվել Խառատյանի որդին՝ 13-ամյա Քոչարը, իսկ դուստրը՝ 12-ամյա Անին, տեղափոխվել հիվանդանոց: Վերջինի վիճակը ծանր է, սակայն արդեն կոմայից դուրս է եկել: Վթարի հետեւանքով մահացել էր նաեւ մոտոցիկլավարը:
Հիշեցնենք, որ ավտովթարից մահացած վրացի մոտոցիկլավարի ընտանիքը բողոք է ներկայացրել Հայաստանի քաղաքացի Սամվել Խառատյանի դեմ, ինչի հետեւանքով էլ վերջինիս թույլ չէին տալիս նույնիսկ գալ Հայաստան՝ մասնակցելու վթարի ժամանակ մահացած իր 13-ամյա որդու հուղարկավորությանը: Թույլտվությունը ստացվել էր միայն օգոստոսի 20-ին՝ հյուպատոսի, դեսպանի եւ պատգամավորների երաշխավորությամբ: