Երեւանի Գրիգորիչ Լուսավորիչ փողոցում՝ քաղաքապետարանի մոտ, ոստիկանները այսօր՝ հոկտեմբերի 2-ին, արդեն երկրորդ անգամ փակեցին կարմիր գծերի դեմ բողոքող «Դուրս մեր գրպանից» նախաձեռնության անդամների ճանապարհը, որոնք ԱԺ շենքի դիմաց իրենց բողոքի ակցիան անցկացնելուց հետո մի քանի տասնյակ մեքենաներով վերադառում էին գրասենյակ։
Ոստիկանները թույլ չէին տալիս, որ վարորդները շարժվեն Հանրապետության հրապարակի կամ Կրկեսի ուղղությամբ՝ նշելով, որ նրանք կարող են շարժվել աջ՝ դեպի Իսակովի պողոտա։
Ակցիայի մասնակիցները փորձում էին համոզել, որ իրենց «Անհնազանդության ավտոերթն» ավարտվել է, ինչը ոստիկաններին չհամոզեց։ Նրանք միայն նախաձեռնության անդամ Վարդան Հակոբյանին թույլ տվեցին մեքենայով դեպի կրկես շարժվել։ Նրա հետեւից ընթացող մեքենայի վարորդը՝ Զավեն Վանոսյանը, փորձեց հետեւել նրան, սակայն ոստիկանները փակեցին նրա ճանապարհը, վարորդը շրջանցեց ոստիկանների մեքենան, ինչը ոստիկանները դիտարկեցին որպես վթարային իրավիճակի ստեղծում եւ մեքենան տարան տուգանային հրապարակ։ Վարորդի եւ ոստիկանների միջեւ վիճաբանություն սկսվեց, վարորդին տարան ոստիկանություն։
Ավտոերթի մասնակիցները դեռ կանգնած են քաղաքապետարանի մոտ։
Հիշեցնենք, որ «Դուրս մեր գրպանից» նախաձեռնության անդամները պահանջում են վերացնել կարմիր գծերը եւ մինչեւ հուլիսի 26-ը արձանագրված տուգանքների համաներում սահմանել։