Տարածաշրջանում աղքատության ամենաբարձր ցուցանիշը Հայաստանում է, ամենացածր նվազագույն աշխատավարձը՝ նույնպես։ Այս մասին այսօր՝ հոկտեմբերի 4-ին, Իջեւանում ընթացող խորհրդարանական ոչ իշխանական երեք ուժերի՝ ԲՀԿ, ՀԱԿ, «Ժառանգություն», իրազեկման հանրահավաքին ասաց ԱԺ ԲՀԿ խմբակցության պատգամավոր Միքայել Մելքումյանը։
«Բա մեզ սազո՞ւմ ա։ Դուք կարո՞ղ եք օրական 1700 դրամով ապրել։ Բա ո՞նց ապրենք։ Վերջը պիտի պատասխան պահանջե՞նք, թե՞ չէ։ 25-30 հազար դրամ թոշակով հնարավո՞ր ա ապրել, դեղ առնել, ուսման վարձը վճարել»,- ասաց ԲՀԿ-ական պատգամավորը՝ նշելով, որ այսօր Հայաստանում ամենաքիչ ներդրումներն են կատարվում, քանի որ ներդրողները վախենում են մեր երկրի անկայուն վիճակից։
Նրա խոսքով՝ վերջին երեք տարում մեր երկրում 72 անգամ հարկային օրենսդրության մեջ փոփոխություն է կատարվել. «Ներդրողին ո՞վ է երաշխիք տալու։ Հարց եմ տալիս, հարգելի կառավարություն, դուք երաշխավորելու եք այդ ներդրումները»։
ԲՀԿ-ական պատգամավորը հիշեցրեց, որ իշխանությունները զիջման չգնացին եւ չցանկացան ընդունել՝ «Շրջանառության հարկի մասին» վիճահարույց օրենքին իրենց առաջարկած այլընտրանքային օրենքի նախագիծը եւ վստահեցրեց, որ իրենք հետամուտ կլինեն, որպեսզի 36-37 հազար մանր ու միջին ձեռնարկությունները չփակվեն։
«Եթե խոշորը կարող է երկու տարի դիմանալ, փոքրը եթե 2 ամիս ապրանք չստացավ փակվելու ա։ Սա բիզնես չի, սա սոցիալական խնդիր ա։ Ինչի՞ եք ուզում նորից հարկային տեսուչին ուղարկել փոքր ձեռնարկություն»,- ասաց պատգամավորը՝ նշելով, որ շրջանառության փաստաթղթավորման դեպքում փոքր բիզնեսն այլընտրանք չունենալով փակվելու է, եւ իջեւանցիներին հրավիրելով մասնակցել հոկտեմբերի 10-ին Ազատության հրապարակում կայանալիք եռյակի համապետական հանրահավաքին։
