Ազգային ժողովի ոչ իշխանական եռյակը՝ ԲՀԿ-ն, ՀԱԿ-ն ու «Ժառանգությունն» իրենց համատեղ համապետական հանրահավաքը հրավիրել են հոկտեմբերի 10-ին, քանի որ սա «ամենահարմար» ուրբաթն է: Այս մասին այսօր՝ հոկտեմբերի 8-ին, Գյումրիում եռյակի մարզային իրազեկման հանրահավաքի ժամանակ ասաց ԱԺ ՀԱԿ խմբակցության ղեկավար Լեւոն Զուրաբյանը:
«Իշխանությունները Ռուսաստանում ներկայացնում են, որ ընդդիմությունը հատուկ նշանակել է հանրահավաքը հոկտեմբերի 10-ին, որ չթողնի Սերժ Սարգսյանին անդամագրվել ԵՏՄ-ին: Ամենահետաքրքիրն այն է, որ նույն մարդիկ ամերիկացիներին էլ ասում են, որ ընդդիմությունն այդ օրն է անում իր հանրահավաքը, որ Սերժ Սարգսյանը գնա ու անդամագրվի ԵՏՄ-ին: Ո՞նց կարելի է շուռ տալ իրականությունը: Այսքան ողորմելի հնարքների են դիմում, նրանք իսկապես վախեցած են: Մենք հոկտեմբերի 10-ին ենք նշանակել, որ կառավարության ներկայացրած մեր ժամկետը սեպտեմբերի 30-ին էր լրանում, իսկ դրանից հետո սա ամենահարմար ուրբաթն է»,-ասաց ՀԱԿ պատգամավորը:
Նշենք, որ եռյակի համատեղ համապետական հանրահավաքը տեղի կունենա հոկտեմբերի 10-ին Ազատության հրապարակում: Նույն օրը ենթադրվում է, որ Մինսկում կստորագրվի Հայաստանի՝ ԵՏՄ-ին անդամակցելու պայմանագիրը:
