Ամերիկյան Սիեթլ քաղաքից շուրջ 50 կմ հեռավորությամբ գտնվող Մերիսվիլ քաղաքի դպրոցներից մեկում մարդասպանն անկանոն կրակ է բացել: Seattle Times-ը, վկայակոչելով իրավապահ մարմինների սպաներին, գրում է, որ մարդասպանը մահացել է ինքն իրեն հասցրած հրազենային վիրավորումից:
Ոստիկանությունն առայժմ մանրամասներ չի հաղորդում, սակայն հանրության շրջանում տեղեկություններ են պտտվում 7 սպանվածի մասին: Ողբերգությունը տեղի է ունեցել առավոտյան ժամը 11-ի սահմաններում:
Ոստիկանությունը շարունակում է զննել դպրոցի շենքը, սակայն առայժմ միայն թաքնված աշակերտների եւ ուսուցիչների է գտնում:
Իրավապահները ծնողներին խնդրել են չմոտենալ դպրոցին: Նրանցից մեկը՝ Ջերի Հոլսթոնը, պարբերականի թղթակցին ասել է, որ երբ հրաձգությունը սկսվել է, որդին անմիջապես զանգահարել է իրեն եւ ասել. «Հայրիկ, այստեղ կրակում են: Խնդրում եմ, արի՛»:
«Անմիջապես դպրոց շտապեցի: Ես, հավանաբար, ժամում 100 մղոն արագությամբ էի ընթանում, ոչ մի բանի ուշադրություն չէի դարձնում: Առաջին իսկ օրից, երբ երեխաներս դպրոց գնացին, ես վախենում էի, որ նման բան կարող է տեղի ունենալ»,- հայտարարել է Հոլսթոնը: Ի դեպ, նրա երկու երեխաներն էլ անվնաս են:
