Ղարաբաղյան հակամարտության հարցում առաջ շարժվելու համար անհրաժեշտ է համընդգրկուն խաղաղ համաձայնագիր մշակել: Երեկ՝ հոկտեմբերի 27-ին, ղարաբաղյան հարցի շուրջ գագաթնաժողովի ընթացքում Հայաստանի եւ Ադրբեջանի նախագահներին է դիմել Ֆրանսիայի նախագահ Ֆրանսուա Օլանդը:
Ելիսեյան պալատի մամուլի ծառայությունից հաղորդել են, որ գագաթնաժողովի ընթացում Ֆրանսիայի ղեկավարը նշել է տեղում երկու կողմերի հարաբերություններում առկա լարվածության արդյունավետ նվազեցման անհրաժեշտության մասին: Հայաստանի եւ Ադրբեջանի նախագահներ Սերժ Սարգսյանն ու Իլհամ Ալիեւը որոշել են անցնել Կարմիր խաչի միջազգային կոմիտեի հովանու ներքո հակամարտության ժամանակ անհայտ կորածների մասին տեղեկությունների փոխանակմանը:
Ֆրանսուա Օլանդը նաեւ Հայաստանի եւ Ադրբեջանի ղեկավարներին կոչ է արել բանակությունների ճանապարհով ղարաբաղյան հակամարտության ամուր կարգավորման ուղղությամբ ակտիվացնել ջանքերը՝ միջազգային իրավունքի սկզբունքների համապատասխան եւ Միսնկի խմբի համանախագահների կողմից սահմանված սկզբունքների հիման վրա: Նա նշել է, որ ստատու-քվոն անընդունելի է:
Բացի այդ, Ֆրանսիայի նախագահը Հայաստանի եւ Ադրբեջանի նախագահներին կոչ է արել տարաձայնությունների հաղթահարման եւ իրենց բնակչությանը խաղաղությանը նախապատրաստելու համար անհրաժեշտ քաղաքական կամք դրսեւորել:
Սերժ Սարգսյանն ու Իլհամ Ալիեւը պայմանավորվել են երկխոսության շարունակության շուրջ, այդ թվում՝ 2015թ. սեպտեմբերին Նյու-Յորքում անցկացվելիք Միավորված ազգերի կազմակերպության գլխավոր ասամբլեայի կողասրահներում:
Ֆրանսիայի նախագահի կողմից, Հայաստանի եւ Ադրբեջանի նախագահների պատվին Ելիսեյան պալատում կազմակերպված երեկոյան ընթրիքին Ֆրանսուա Օլանդն ու նրա հյուրերը ավելի լայնորեն քննարկել են կովկասյան տարածաշրջանի զարգացման վերաբերյալ հարցրերը:
Ինչպես ավելի վաղ հայտնել էր NEWS.am-ը, երեկ՝ հոկտեմբերի 27-ին, Հայաստանի եւ Ֆրանսիայի նախագահների հանդիպումից հետո Փարիզի Մարինյի պալատում ԵԱՀԿ Մինսկի խմբի համանախագահների մասնակցությամբ մեկնարկել են ԼՂ հիմնախնդրի կարգավորմանն ուղղված Հայաստանի եւ Ադրբեջանի նախագահների բանակցությունները: Դրանք ավելի ուշ կամփոփվեն Ֆրանսիայի, Հայաստանի եւ Ադրբեջանի նախագահների ու ԵԱՀԿ Մինսկի խմբի եռանախագահների համատեղ հանդիպման ժամանակ:
