Եվրամիության «Արեւելյան գործընկերության» ծրագիրն ընդհանրապես եւ Հայաստանի հետ բազմակողմանի համագործակցությունը՝ մասնավորապես, ամենայն հավանականությամբ, կշարունակվի: Այս մասին NEWS.am-ի թղթակցի հետ զրույցում հայտարարեց Արեւմտյան Անգլիայի Բրիստոլի համալսարանի պրոֆեսոր Գյունտեր Վալցենբախը:
Նրա խոսքով, Եվրասիական տնտեսական միությանն անդամակցելու Հայաստանի որոշումն անակնկալ էր շատերի համար: «Եվրամիության սկզբնական արձագանքը, որն ընդգծեց ինտեգրման երկու ձեւերի միջեւ անհամատեղելիությունը, վերջերս փոխարինվեց Բրյուսելի կողմից որոշակի հանդարտեցնող եւ հուսադրող ազդանշաններով»,- նշեց Վալցենբախը: Նա հավելեց, որ ԵՄ Արտաքին հարաբերությունների քաղաքական անվտանգության հարցերի գերագույն հանձնակատարի Քեթրին Էշթոնի, Ընդլայնման եւ եվրոպական հարեւանության քաղաքականության հարցերի հանձնակատար Շտեֆան Ֆյուլեի եւ Գերմանիայի ԱԳ նախարար Ֆրանկ-Վալտեր Շթայնմայերի հայտարարություններն այդ մասին են վկայում:
«Չնայած այս փուլում դա պաշտոնապես չի արձանագրվել Ասոցացման նոր՝ «ավելի թեթեւ» տարբերակով, Եվրոպական հարեւանության գործիքի երկկողմ չափման համատեքստում 2014-2017թ.թ.-ին Հայաստանի համար հատկացված միջոցները համապատասխանում են վերջին 3 տարիներին ստանձնած պարտավորություններին»,- ընդգծեց փորձագետը:
Անցյալ տարի Վիլնյուսի գագաթաժողովի ժամանակ տեղի ունեցած իրադարձությունները, նրա համոզմամբ, չեն դիտարկվում որպես հակասություն Եվրամիության գործընկերության «ավելին ավելիի դիմաց» սկզբունքին կամ Հարավային Կովկասում ժողովրդավարության հետ կապված իրավիճակը բարելավելու հետագա փորձերին:
«Իհարկե, ժամանակի ընթացքում պետք է փոփոխություններ սպասել՝ հատկապես հաշվի առնելով Եվրահանձնաժողովի նորացումը: Առաջիկա հինգ տարիների համար կառույցի մտադրությունները լավ հայտնի են. Եվրամիության «Արեւելյան գործընկերության» համար հրամայական է լինելու քաղաքական բարեփոխումների կուրսի պահպանումը՝ յուրաքանչյուր առանձին երկրի համար իրական շեշտադրմամբ»,- նշեց Գյունտեր Վալցենբախը: Հայաստանի դեպքում, ըստ փորձագետի, դա կարող է նշանակել քաղաքացիական հասարակության խաղացողների ավելի նշանակալի ճանաչում:
