Թուրքիայի նախագահ Ռեջեփ Թայիփ Էրդողանը Ֆրանսիայի միջազգային հարաբերությունների ինստիտուտում հայտարարել է, թե Թուրքիան Հայաստանի նկատմամբ բարի կամք է ցուցաբերել եւ խաղաղության ձեռք է մեկնել, սակայն հայերը մերժել են այն։

Թուրքական Haber3 կայքի փոխանցմամբ՝ Ֆրանսիայի նախագահ Ֆրանսուա Օլանդի հրավերով Փարիզ մեկնած Թուրքիայի նախագահ Ռեջեփ Թայիփ Էրդողանը Ֆրանսիայի միջազգային հարաբերությունների ինստիտուտում հանդես է եկել ելույթով, որի ժամանակ անդրադարձել է Հայաստանի հետ հարաբերություններին եւ 1915-ի Ցեղասպանությանը։

Էրդողանը հայտարարել է, թե 1915-ի հետ կապված երկար տարիներ անարդարություններ են տեղի ունենում Թուրքիայի նկատմամբ՝ պնդելով, թե այդ իրադարձություններին չեն ներկայացվել առանց ապատեղակատվության։ «Չնայած մեր բոլոր կառուցողական վերաբերմունքին, Հայաստանը եւ Հայկական սփյուռքը ողջամիտ պահվածք չեն ցուցաբերել։ Մեն ուզում ենք, որ այդ հարցը հանվի քաղաքականությունից, դադարի լինել քաղաքական գործիք եւ հանձնվի պատմաբաններին։ Թող պատմաբանները աշխատեն այդ հարցի վրա։ Մենք մեր արխիվները բացել ենք ու այս պահին 1 մլն փաստաթուղթ է ներկայացվել»,-ասելէ Էրդողանը՝ անդրադառնալով նաեւ Հայաստան-Թուրքիա հարաբերություններին։

«Մենք ենք եղել Հայաստանի հետ հարաբերությունները զարգացնելու համար առաջին քայլ անողը եւ ձեռք մեկնողը, սակայն մեր բարի կամքը, ցավոք, հայերի մոտ պատասխան չգտավ։ Մենք 1915-ի հետ կապված շարունակելու ենք «ճշմարտությունները» պատմելու մեր ջանքերը»,-շեշտել է Թուրքիայի նախագահը։