Հայաստանի պետական ճարտարագիտական համալսարանի մոտ 2013թ. ապրիլին 19-ամյա Տիգրան Հայրապետյանին սպանելու համար 10 տարվա ազատազրկման դատապարտված 17-ամյա Հայկ Աղամալյանի հարազատները չեն ընդունում դատարանի վճիռը եւ շարունակում են պնդել, որ սպանությունը Հայկը չի կատարել:
NEWS.am-ի թղթակցի զրույցում Հայկի մայրը՝ Նարինե Արիստակեսյանը հայտնեց, որ եթե դատավորն ընդուներ փաստաբանի միջնորդությունները, ապա կապացուցվեր, որ Հայկն անմեղ է:
«Այս երկրում արդարություն չկա, ոչ էլ օրենք կա, առանց համալիր փորձաքննություների՝ մարդ են դատում: Հայկս էլ է վատ վիճակում, բայց մենք այսպես չենք թողնելու, պատրաստվում ենք դիմել Վերաքննիչ դատարան: Մինչեւ վերջ գնալու ենք, որ ապացուցվի տղայիս անմեղությունը»,- նշեց տիկին Նարինեն:
Նշենք, որ նոյեմբերի 25-ին Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում Հայկը մեղավոր ճանաչվեց ՀՀ ՔՕ 104-րդ հոդվածի 2-րդ մասի 10-րդ կետով եւ 258-րդ հոդվածի 4-րդ մասով՝ դատապարտվելով 10 տարվա ազատազրկման։
Հիշեցնենք, որ ըստ մեղադրական եզրակացության՝ Հայկ Աղամալյանը Տերյան փող. 72շ. հարեւանությամբ մի խումբ անձանց հետ վիճաբանության ժամանակ դանակով հարվածել է Տիգրան Հայրապետյանի կրծքավանդակին եւ նրան ապօրինաբար զրկել կյանքից:
