Հայաստանի Հանրապետության եւ Լեռնային Ղարաբաղի միջեւ մաքսակետի հարցը երբեք չի բարձրացվել Եվրասիական տնտեսական միության բանակցությունների ժամանակ: Այդ մասին այսօր՝ նոյեմբերի 26-ին ԱԺ տնտեսական հարցերով մշտական հանձնաժողովի նիստին հայտարարեց ֆինանսների փոխնախարար Սուրեն Կարայանը՝ ներկայացնելով Եվրասիական տնտեսական միությանը Հայաստանի անդամակցության մասին պայմանագիրը:
Նա նկատեց, որ եղել է այդ բանակցությունների ակունքում եւ մասնակցություն ունեցել ողջ ընթացքին: «Ուստի ես ծանոթ եմ իրավիճակին եւ կարող եմ կրկին ընդգծել. բանակցությունների ժամանակ նմանատիպ հարց երբեք չի բարձրացվել եւ չի արծարծվել», - ընդգծեց Կարայանը:
Հիշեցնենք, մայիսին Ռուսաստանը, Բելառուսն ու Ղազախստանը ստորագրել եւ վավերացրել էին 2015թ. հունվարի 1-ից Եվրասիական տնտեսական միություն ստեղծելու պայմանագիրը, հոկտեմբերի 10-ին ստորագրվել էր Միությանը Հայաստանի անդամակցության մասին պայմանագիրը: