90 տարեկան հասակում մահացել է անգլիացի ամենահայտնի գանգստեր Ֆրենկի Ֆրեյզերը, որը կյանքի գրեթե կեսն անցկացրել է բանտում: Նա հայտնի է նաեւ «խելագար Ֆրենկի» կամ «Դենթիսթ» մականուններով: Վերջին մականունն ստացել է մյուս գանգստերների ատամները հարթաշուրթով քաշելու սովորություն ունենալու պատճառով:
Ֆրեյզերը Արեւելյան Լոնդոնի գանգստերների սերնդի ողջ մնացած վերջին նեկայացուցիչն էր, որոնք պարբերաբար հայտնվել են 1960-ականների թերթերի քրեական թողարկումների բաժիններում, նշում է BBC-ն: Նա բանտից դուրս էր եկել 1989 թ.՝ այնտեղ անցկացնելով ընդհանուր առմամբ 42 տարի: Չնաած տարիքին, Ֆրենկի Ֆրեյզերը Մեծ Բրիտանիայի ամենավտանգավոր մարդն է եղել, հայտնում է Lifenews-ը:
Անցյալ շաբաթ Ֆրեյզերը ձախ ոտքի վիրահատության էր ենթարկվել, որից հետո կոմայի մեջ էր ընկել: Նոյեմբերի 26-ին Ֆրեյզերի ընտանիքը որոշել էր հրաժարվել արհեստական կենսապահովման սարքից:
Ենթադրվում է, որ Ֆրեյզերը ոտքի վնասվածքն ստացել է դեռեւս 1969 թ.՝ «Փարքհերսթ» բանտի խռովությունների ժամանակ, որի հրահրողը հենց ինքն էր եղել: Նրա առաջին ազատազրկումը տեւել էր 20 տարի:
Ֆրեյզերը հաճախ հեռուստատեսությամբ կիսվել է իր անցյալի հիշողություններով: Նրա ինքնակենսագրությունը ակնթարթորեն տարածվել էր կես միլիոն օրինակով: Բրիտանական հեռուստաալիքներից մեկը նույնիսկ նրա հիշողություններն էկրանավորելու ծրագիր է սկսել:
