Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում շարունակվում է Վազգեն Խաչիկյանի եւ սոցիալական ծառայության 12 աշխատակիցների գործով դատավարությունը:

Այսօր` նոյեմբերի 27-ին, պաշտպանական ճառերով հանդես են գալիս ամբաստանյալների փաստաբանները:

Առաջինը ճառով հանդես եկավ Արթուր Սուքիասյանի փաստաբանը: Վերջինը դատարանին խնդրեց հաշվի առնել փաստը, որ իր պաշտպանյալն ընդունել է հանցանքը եւ անկեղծ զղջացել կատարվածի համար:

«Մարդասիրական վերաբերմունք դրսեւորեք եւ պայմանական պատիժ կիրառեք Արթուր Սուքիասյանի նկատմամբ»,- նշեց փաստաբանը:

Ամբաստանյալ Սարգիս Սարգսյանի փաստաբան Արշակ Թովմասյանն էլ համոզմունք հայտնեց, որ իր պաշտպանյալի` կազմակերպված խմբի անդամ լինելը, չի ապացուցվել դատաքննության ժամանակ:

«Պատճառված վնասը մեր մասով լրիվ փոխհատուցված է: Դատախազը պահանջում է 4 տարի 7 ասմվա ազատազրկում, որի հետ մենք համաձայն չենք: Հաշվի առնելով, որ նա առաքինի անձնավորություն է, ստացել է մրցանակ վարչապետի կողմից, ինչպես նաեւ մասնակցել է Արցախյան հերոսամարտին` խնդրում եմ պատիժը պայմանական կիրառել»,- ավելացրեց Արշակ Թովմասյանը:

Հիշեցնենք, որ ըստ մեղադրական եզրակացության՝ ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետ Վազգեն Խաչիկյանը ծառայության մի շարք պաշտոնատար և պատասխանատու անձանց հետ կազմակերպված խմբով 2006–2010թթ. ընկած ժամանակահատվածում, օգտագործելով իրենց պաշտոնական դիրքը, պաշտոնական կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի, ընդհանուր՝ 267.266.000 ՀՀ դրամ գումար։ Դատախազը Վազգեն Խաչիկյանի համար պահանջել է 13 տարվա, իսկ ամբաստանյալ Հովհաննես Գրիգորյանի համար՝ 6 տարի, 2 ամսվա ազատազրկում։