ԱՄՆ դոլարի կտրուկ թանկացումը եւ դրամի արժեզրկումը Հայաստանի տնտեսության վրա ավելի շատ բացասական ազդեցություն կունենա, քան դրական: Այս մասին NEWS.am-ի թղթակցի հետ զրույցում ասաց տնտեսագետ Արտակ Մանուկյանը:
Նա համաձայն չէ ԿԲ-ի եւ վարչապետ Հովիկ Աբրահամյանի հայտնած կարծիքի հետ, թե այն կարող է նաև դրական ազդեցություն թողնել արտահանողների վրա, քանի որ կարող է օգնել նրանց՝ կազմակերպել արտադրությունը, իրացումն ու արտահանումը և ստեղծել աշխատատեղեր։ «Դա տեսականորեն այդպես է, քանի որ աշխատավարձի կոմպոնենտը ըստ էության էժանանում է եւ ապրանքը ավելի մրցունակ է դառնում, բայց այդ ամեն ինչը չի վերաբերում Հայաստանի տնտեսությանը: Մեր երկրում տնտեսական օրենքները չեն գործում, եւ հետո մեր մոտից հիմնականում արտահանվում են հանքահումքային ռեսուրսներ: Միանշանակ է, որ ավելի շատ բացասական կազդի մեր տնտեսության վրա, քան դրական»,-ասաց նա:
Տնտեսագետն ասաց, որ արտադրողների մասին ունեցած դրական ազդեցության մասին միայն կարելի է խոսել տեսականորեն, քանի որ բացառվում է, որ մեր մոտ նման կարգի լայնամաստշաբ արտադրություններ չկան, որի հաշվին նորանոր շուկաներ կգրավեն: Մյուս կողմից էլ, որպեսզի արտադրությունը դառնա մրցունակ փոխարժեքի նման տատանումների պարագայում, անհրաժեշտ է մի քանի ամիս, սակայն տնտեսագետը խիստ կասկածում է, որ երկարաժամկետ ժամանակահատվածում արտադրության ծավալները կավելանան:
Անդրադառնալով Ամանորից առաջ սպասվող գնաճին՝ Արտակ Մանուկյանն ասաց, որ դա ավելի շատ պայմանավորված կլինի դրամի փոփոխությունը, քան ԵՏՄ անդամակցությունը:
