Հայաստանի գյուղատնտեսության նախարարությունն ավելի քան 10 տարի է ոլորտը ապահովագրելու համար ուսումնասիրություններ է իրականացնում, ինչի արդյունքում պատրաստվում է ԻՆԳՈ ԱՐՄԵՆԻԱ ապահովագրական ընկերության հետ մարզերից մեկում` Վայոց Ձորում, իրականացնել անասնագլխաքանակի ապահովագրման պիլոտային ծրագիր: Այս մասին հայտարարեց ՀՀ գյուղատնտեսության փոխնախարար Գառնիկ Պետրոսյանը նոյեմբերի 21-ին տեղի ունեցած «Տեղական զարգացման բարելավված պլանավորման միջոցով կլիմայի փոփոխության ռիսկերի մեղմումը գյուղական համայնքներում» աշխատաժողովի շրջանակներում: Միջոցառումը կազմակերպվել էր UNDP աջակցությամբ:
Ինչպես նշեց ԻՆԳՈ ԱՐՄԵՆԻԱ-ի հատուկ նախագծերի ներդրման ու զարգացման դեպարտամենտի ղեկավար Արտակ Մարտիրոսյանը, մարզի ընտրությունն պայմանավորված է այն հանգամանքով, որ նշված մարզում իրականացվել է խոշոր եղջերավորների հաշվառում եւ համարակալում:
«Մեր խորին համոզմամբ, ապահովագրողների համար` որպես ռիսկ կրողների, առավել գրավիչ կլինի սկսել պիլոտային ծրագրերը առավել վերահսկելի լինելու տեսակներից՝ մասնավորապես, գյուղատնտեսական նշանակության կենդանիների ապահովագրությունից»,- ասաց նա, հավելելով, որ վերջինս հնարավորություն կտա հասկանալու գյուղատնտեսությունում գործող ենթկառուցվածքների միջեւ փոխհարաբերությունները եւ վերհանել առկա խնդիրները: Այս ամենն, իհարկե, կնպաստի հետագայում առավել ռիսկային համարվող ոլորտներում ապահովագրական ծրագրերի իրականացմանը:
Ինչպես հայտնի է, գյուղատնտեսության ապահովագրության ներդրման գործընթացներից այսօր հատկապես կարեւորվում է ՀՀ գյուղատնտեսության նախարարի հրամանով ձեւավորված աշխատանքային խմբի գործունեությունը, որն ուղղված էՀայաստանի գյուղատնտեսության ոլորտում ապահովագրական համակարգի աստիճանական ներդրման նախադրյալների ստեղծմանը:Աշխատանքային խմբի անդամ է նաեւ ԻՆԳՈ ԱՐՄԵՆԻԱ ապահովագրական ընկերության ներկայացուցիչը:
«Այսպիսով, 2015թ. առաջին կիսամյակում մենք հնարավորություն կունենանք կյանքի կոչելու այս ծրագիրը: Դրա համար կարեւորում ենք ստանալ աջակցություն նաեւ շահագրգիռ միջազգային կառույցների կողմից», - ընդգծեց Ա. Մարտիրոսյանը, ավելացնելով, որ ԻՆԳՈ ԱՐՄԵՆԻԱ-ն պատրաստակամ է նաեւ իր մասնակցությունն ունենալ բերքի ապահովագրության պիլոտային ծրագրերում: